Нипах вирусы: ҚР денсаулық министрлігі шұғыл мәлімдеме жасады

Денсаулық сақтау министрлігі елде Нипах вирусын жұқтыру жағдайлары тіркелмегенін хабарлады. Қазіргі уақытта эпидемиологиялық жағдай тұрақты және бақылауда. Соған қарамастан, Үндістандағы эпид-жағдайға байланысты мемлекеттік шекара арқылы өтетін барлық өткізу пункттерінде санитарлық-карантиндік бақылау күшейтілді, деп хабарлайды Денсаулық сақтау министрлігі.

Үндістаннан және ауру тіркелген Оңтүстік-Шығыс Азияның басқа елдерінен келетін тұлғаларға ерекше көңіл бөлінуде. Осы инфекция бойынша қолайсыз елдердің тізімі тұрақты түрде қайта қаралып, жаңартылып отырады. Медициналық ұйымдар инфекцияның сырттан келуі мүмкін жағдайына дайындыққа келтірілді. Шұғыл медициналық көмек көрсету бригадалары мен инфекциялық стационарлардың дайындығы қамтамасыз етілді, дәрі-дәрмектердің, жеке қорғаныс құралдары мен дезинфекциялау құралдарының азаймайтын қоры жасақталды, - делінген ҚР Денсаулық сақтау министрлігінің хабарламасында.

Ведомство Нипах вирусының зооноздық инфекцияларға жататынын және адамға жануарлардан (соның ішінде жарқанаттар мен шошқалардан), сондай-ақ инфекция жұқтырған адаммен тығыз байланыста болғанда жұғатынын атап өтті. Сонымен қатар ластанған тағамдар мен сусындар арқылы да жұғуы мүмкін. Ауру жоғары дене қызуымен, бас ауруымен, жалпы әлсіздікпен, ал ауыр жағдайларда орталық жүйке жүйесінің зақымдануымен және пневмонияның дамуымен қатар жүруі мүмкін.

Бүгінгі таңда Нипах вирусына қарсы арнайы емдеу әдісі мен мақұлданған вакцина жоқ, медициналық көмек симптоматикалық сипатта болады, - деп атап өтті ҚР ДСМ.

Сондай-ақ ведомство эндемиялық елдерге баруды жоспарлаған азаматтарға жеке профилактика шараларын сақтауды және елге оралғаннан кейін ауру белгілері пайда болған жағдайда, дәрігерге қай елде болғанын хабарлай отырып, дереу медициналық көмекке жүгінуді ұсынады.

Бұған дейін Үндістанда қауіпті Нипах вирусының өршігені хабарланған болатын. Батыс Бенгалия штатында вирусты жұқтырудың бес жағдайы анықталды.