Непалдағы алапат тасқын: зардап шеккендер арасында қазақстандықтар бар ма

Непал мен Қытай шекарасындағы жойқын тасқыннан зардап шеккендер мен із-түзсіз жоғалғандар арасында әзірге Қазақстан азаматтары жоқ. Бұл туралы Қазақстан Сыртқы істер министрлігі хабарлады.

«Қазіргі уақытта Непал мен Қытай шекарасындағы су тасқыны салдарынан зардап шеккендер мен із-түзсіз жоғалғандар арасында Қазақстан азаматтары жоқ», – делінген министрлік мәліметінде.

СІМ жағдай қазақстандық дипломаттардың бақылауында екенін атап өтті. Ведомство дерек күн ішінде жаңаруы мүмкін екенін де ескертті.

Соңғы мәлімет бойынша, Непал мен Қытайда із-түзсіз жоғалғандар саны 1,5 мың адамға дейін өскен. Бұған дейін Непалда кемінде 157 адамның қаза тапқаны хабарланған.

Апат Непалдың Тибетпен шекарасына жақын аумағында жүрген көшкіннен кейін болған. Тасқын жолдарды, көпірлерді, байланыс желілері мен су электр энергетикасы нысандарын бүлдірді.

Табиғи апат Қытай аумағына да зардабын тигізді. Көшкін Шигадзе маңындағы Гиронг шекара бекетіне соғып, жол, электр және байланыс желілерін істен шығарған. Шекара маңында 70-тен астам әскери қызметкер, полиция, кеден және шекара қызметінің өкілдері де із-түзсіз жоғалғандар қатарында.