Неліктен бірыңғай QR-мен төлеу әлі де барлық жерде бірдей іске аспай жатыр?

Қазақстанда жаңадан енгізілген бірыңғай QR төлем жүйесі тұрғындар арасында кеңінен қолданыла бастағанымен, кейбір сауда орындарында, автотұрақтарда және қоғамдық көлікте әлі де кедергілер кездесуде. Осы мәселеге қатысты Ұлттық банк төрағасының орынбасары Бинур Жаленов «Central Asia Fintech Summit 2026» форумында арнайы пікір білдірді.

Ұлттық банк өкілінің айтуынша, бұл іркілістердің басты себебі  банк терминалдарындағы динамикалық кодтар мен қабырғаларға жапсырылған статикалық QR-наклейкалардың айырмашылығында. Қазіргі уақытта ескі үлгідегі наклейкаларды жаңа жүйеге сәйкестендіріп ауыстыру процесі жүріп жатыр. Барлық орындардағы наклейкаларды физикалық түрде қайта жаңарту белгілі бір уақытты талап етеді. Ұлттық банк бұл өткел кезеңін алдағы жарты жыл ішінде толығымен аяқтауды жоспарлап отыр.

Сонымен қатар Бинур Жаленов маңызды ескерту жасады: егер сауда нүктесіндегі электронды платеж терминалы бірыңғай QR арқылы төлемді қабылдаудан бас тартса, бұл ел заңнамасын тікелей бұзу болып табылады. Себебі POS-терминалдардың барлығы бұл жүйені кедергісіз қолдауы тиіс.

Статистикаға сүйенсек, бүгінгі күнге дейін бірыңғай QR арқылы 20 миллионнан астам операция жүзеге асырылған. Төлемдердің 99,5 пайызы сәтті өтіп, тек 0,5 пайыздық бөлігі ғана техникалық ақауларға байланысты жүзеге аспай қалған.