Неге Талғарда резонансты қылмыстар жиі болады? Ішкі істер министрі жауап берді

Ішкі істер министрі Ержан Сәденов Талғар қаласында жиі тіркелетін резонансты қылмыстардың себебін түсіндірді. Бұл туралы ол Үкімет сағатындағы брифинг барысында айтты.

Министрдің айтуынша, қала көрікті болғанымен, оның инфрақұрылымы халық санына сай емес.

«Қала әдемі, бірақ өкінішке қарай, инфрақұрылым талапқа сай келмейді. Менің білуімше, онда 500 мыңнан астам адам тұрады. Бұл – іс жүзінде Алматының іргесіндегі қала. Штаттық бірліктердің тапшылығы бар. Әрине, кей тұста олқылықтар кеткен, жауапты тұлғалар жазаланды – бірінші рет те, екінші рет те», – деді Ержан Сәденов.

Ол қала халқының жыл сайын өсіп келе жатқанын атап өтті. Алайда жасанды интеллектіні енгізу учаскелік инспекторлардың жұмысын алмастыра алмайтынын айтты.

«Профилактикалық жұмысты жүргізу үшін учаскелік инспекторлардың рөлі маңызды. Қаланың жағдайын жақсарту үшін бейнебақылау камераларын көбейту және жедел басқару орталығын ашу жоспарланып отыр», – деді министр.

Сәденовтің айтуынша, болған оқиғалар бойынша ішкі істер органдарының да жауапкершілігі бар.

«Қорытынды бойынша біздің қызметкерлердің де кінәсі бар. Тергеу органдары мен басшылар уақытылы шара қолдануы тиіс еді», – деп қосты ол.

Еске салайық, 2024 жылғы 4 қазанда Талғарда 16 жастағы Шерзат Полат қаза тапқан еді. Кейін марқұмның отбасы тұрған үй өртеніп, Бас прокуратура бұл оқиғаның қасақана жасалған өртеу екенін хабарлаған. 2025 жылдың маусым айында Талдықорғанда сот тоғыз айыпталушыны 1,5 жылдан 23 жылға дейінгі мерзімге бас бостандығынан айырды.

Ал 2025 жылғы 6 қыркүйекте Талғарда тағы бір ауыр қылмыс тіркелді. Ер адам қала тұрғынын өлтіріп, екі жасар қызды ұрлап кеткен. Кейін баланы анасына қайтарған. Алматы облысының прокуратурасы полицейлердің әрекетсіздігі фактісі бойынша қылмыстық іс қозғады.