Неге қазақстандықтар шетелдік ірімшікті таңдайды? Министрдің жауабы

Ауыл шаруашылығы министрі Айдарбек Сапаров үкіметте өткен брифингте қазақстандық ірімшіктердің сапасына қатысты пікір білдіріп, отандық өнімнің импорттық тауарлардан дәмдік сипаттамасы бойынша қалыс қалмайтынын мәлімдеді. Министрдің айтуынша, қазіргі уақытта еліміз сүт, қышқыл сүт өнімдері мен сары майға деген сұранысты толық өтеп отыр, ал ірімшік өндірісі жалпы көлемнің 58%-ын құрайды.

Алдағы уақытта бұл көрсеткішті 80%-ға дейін жеткізу жоспарлануда. Ведомство басшысы өндіріс көлемін арттырумен қатар, сапаны бақылау және шикізат базасын нығайту үшін жаңа сүт-тауарлы фермаларын салу жұмыстары жалғасатынын атап өтті.

Дегенмен Ұлттық талдау орталығы жүргізген зерттеулер тұтынушылардың әлі де шетелдік өнімдерге, олардың әртүрлілігі мен танымалдылығына көбірек мән беретінін көрсетіп отыр. Сарапшылар мұны сапалы шикізат тапшылығымен, сауда желілерімен жұмыс істеудегі қиындықтармен және отандық өнімдердің маркетингтік насихатының аздығымен байланыстырады. Осыған қарамастан, министр Сапаров қазақстандық өндірушілердің әлеуеті жоғары екеніне сенімді. Ол тұтынушылардың таңдауы көбіне баға мен жеке талғамға байланысты екенін айта келе, отандық өнімдердің де нарықта өз орнын тауып, белсенді сатылып жатқанын жеткізді.