Неге қазақстандықтар алтын алудан бас тартып жатыр?

Әлемде алтын бағасы шарықтап жатқанына қарамастан, елімізде халықтың оған деген қызығушылығы күрт төмендеді. Бұл жөнінде Zakon.kz хабарлады.

Ұлттық банктің мәліметінше, 2025 жылдың II тоқсанында банктер мен жекелеген айырбастау пунктері халыққа жалпы салмағы 79,3 келі болатын 4 008 өлшемді алтын құймасын сатқан. Салыстыру үшін: 2024 жылдың осы кезеңінде 779,2 келі (14 752 құйма) сатылған. Яғни сатылым көлемі 10 есеге жуық азайған.

Қаржы сарапшысы Әрсен Темірбаевтың айтуынша, мұндай құлдыраудың басты себебі – бағаның өсуі.

«Алтын бағасының күрт өсуі оны қарапайым халық үшін қолжетімсіз етті. Бір граммның құны бір жылда 60%-ға жуық өсті. Бұл жеке инвесторларды шегінуге мәжбүрледі», – дейді ол.

Расында, 2024 жылғы 1 тамызда бір грамм алтын 36 869 теңге болса, 2025 жылғы 1 тамызда 58 524 теңгеге дейін жеткен. Бұл – 58,73% өсім.

Сатылымның азаюына әсер еткен тағы бір фактор – көктемде елде өлшемді алтын құймаларын жеткізу уақытша тоқтап қалды. Бұл өндірістік және логистикалық тізбектегі үзілістермен байланысты болды. Құймаларды жеткізу қайтадан II тоқсанның соңына қарай қалпына келтірілді.

Ал мемлекет не істеп жатыр?

Халықтың сатып алу белсенділігі төмендегенімен, мемлекет алтын сатып алуды жалғастырып жатыр. 2025 жылғы маусым қорытындысы бойынша Қазақстанның ресми резервтік активтері 51,8 млрд долларды құраса, оның 62,3%-ы немесе 32,3 млрд доллары алтынға тиесілі.

Ұлттық банк 2025 жылы 70 тонна алтын сатып алуды жоспарлап отыр. World Gold Council мәліметінше, жылдың алғашқы жартысында Қазақстан резервтерін 15 тоннаға арттырған. Бұл көрсеткішпен Ұлттық банк әлемдегі алтын сатып алушы орталық банктердің көшін бастап тұр.