Не зейнетақы, не жәрдемақы: Мүгедек адамдарға екеуі қатар берілмейді

Премьер-министрдің орынбасары Тамара Дүйсенова мүгедектігі бар адамдарға бір уақытта зейнетақы мен жәрдемақы берілмеуінің себебін түсіндірді.

Бұған дейін Мәжілістің бір топ депутаты мүгедектігі бар қазақстандықтарға зейнет жасына жеткенде жәрдемақыны тоқтатпай, қоса беруді ұсынған болатын. Олар Әлеуметтік кодекске өзгерістер мен толықтырулар енгізуді ұсынды.

Тамара Дүйсенова мүгедектікке байланысты жәрдемақы мен жасына байланысты зейнетақы әртүрлі әлеуметтік төлемдер екенін және олардың әртүрлі өмірлік қатерлерге негізделгенін айтты.

"Әлеуметтік кодекске сәйкес, мүгедектігі бар адам зейнеткерлік жасқа жеткенде жәрдемақы төлеу тоқтатылып, зейнетақы тағайындалады. Егер тағайындалған зейнетақы бұрын алған жәрдемақыдан аз болса, онда жәрдемақының мөлшеріне дейін толықтырылады. Ал зейнетақы алу құқығы жоқ мүгедектерге (жұмыс істемеген немесе зейнетақы қорына жарналары болмаған жағдайда) мүгедектікке байланысты жәрдемақы мөлшері сақталады," – деп түсіндірді Дүйсенова.

Сонымен қатар мүгедектерге оңалтудың жеке бағдарламасы бойынша қажетті техникалық құралдар мемлекет есебінен тегін беріледі.

Тамара Дүйсенованың мәліметінше, 2025 жылы жәрдемақы мөлшері жалпы ауру бойынша I топқа – 101 702 теңге, II топқа – 81 362 теңге, III топқа – 55 474 теңге, ал бала кезінен мүгедектігі барлар үшін I топқа – 101 702 теңге, II топқа – 84 598 теңге, III топқа – 74 428 теңге болады.

Үкіметтің пікірінше, бұл нормалар халықаралық тәжірибеге сәйкес келеді.

"Бір уақытта зейнетақы мен жәрдемақы алу бюджетке ауыртпашылық түсіретінін ескере отырып, бұл мәселені қарастыру жоспарда жоқ," – деді Тамара Дүйсенова.