Назарбаевтың табанды еңбегіне әділ баға беру қажет – Тоқаев

Президент Қасым-Жомарт Тоқаев Қазақстан Республикасы Конституциясының 30 жылдығына орай сөз сөйледі. Мемлекет басшысы өз сөзінде еліміздің негізгі заңының тарихына тоқталып, оның қабылдануындағы тұңғыш Президент Нұрсұлтан Назарбаевтың рөліне ерекше назар аударды. Мемлекет басшысы оның табанды еңбегіне әділ баға берілуі тиіс екенін айтты.

"Конституция туралы айтқанда, тұңғыш Президент Нұрсұлтан Әбішұлы Назарбаевтың табанды еңбегіне әділ баға беру қажет. Ол Конституция қабылданған кезде Мемлекет басшысы ретінде шешуші рөл атқарды", – деді Қасым-Жомарт Тоқаев.

Мемлекет басшысы еліміздің алғашқы Ата заңы 1993 жылы қабылданғанын, алайда тарихи жағдайға байланысты 1995 жылы жаңа Конституция бекітілгенін еске салды.

Сонымен қатар Қасым-Жомарт Тоқаев соңғы отыз жылда Конституцияға алты рет түзету енгізілгенін, оның ішіндегі ең ауқымдысы – үш жыл бұрынғы конституциялық реформа екенін айтты. Ол саяси-құқықтық жүйеге түбегейлі өзгеріс әкелгенін атап өтті.

"Сол кезде Конституцияға түзетулерді Парламент арқылы өткізу керек деген ұсыныс кеңінен айтылды. Бірақ күрделі болса да, басқа жолды таңдау жөнінде шешім қабылданды. Ел болашағына тікелей әсер ететін аса маңызды шешімдерді тек қана референдум арқылы қабылдау қажет деген ұстанымды міндетті түрде сақтау керек деп ұйғардым", – деді Президент.

Еске сала кетейік, 2022 жылғы 5 маусымда өткен республикалық референдумнан кейін Конституцияның 33 бабына 56 түзету енгізілді. Бұл өзгерістер 1995 жылы таратылған Конституциялық сотты қайта құруды, Президентке саяси партияға мүше болуға және оның жақын-туыстарына саяси әрі квазимемлекеттік секторда қызмет атқаруға тыйым салуды, Парламенттің құрамы мен сайлау жүйесін өзгертуді, саяси партияларды тіркеу тәртібін жеңілдетуді қамтыды. Сондай-ақ өлім жазасына түбегейлі тыйым салынып, жерге меншік түріне қатысты нормалар нақтыланды.