Назарбаев Университеті 73 млрд теңге неге тиімсіз жұмсалғанын түсіндіріп берді

Назарбаев Университеті Жоғары аудиторлық палатаның есебінде көрсетілген 73 млрд теңгенің тиімсіз пайдаланылуына қатысты пікір білдірді.

"Тексеру барысында анықталған қаржылық бұзушылықтар студенттердің жол шығындарын өтеу мен мемлекеттік стипендияларды төлеу рәсімдеріне қатысты және университеттің академиялық және ғылыми қызметіне әсер етпейді", – делінген университеттің хабарламасында.

Университет палатаның ұсынымдарын орындау бойынша жоспар әзірлеп, оны жүзеге асыруды бастап кеткенін атап өтті. Бұл жұмыстардың нәтижелері Қамқоршылық кеңесіне есеп ретінде ұсынылатын болады.

Сонымен қатар университет Жоғары аудиторлық палатаның төрағасы Әлихан Смайыловтың университеттің 97%-ы республикалық бюджеттен қаржыландырылатыны туралы мәлімдемесімен келіспейтінін айтты.

"2024 жылы университеттің республикалық бюджеттен алатын қаржысы – жалпы қаржыландыру көлемінің 50%-ы. Қалған сома эндаумент-қор, демеушілік қаражат, сондай-ақ білім беру, ғылыми-зерттеу және басқа да қызмет көрсету есебінен қамтамасыз етіледі", – делінген хабарламада.

Сондай-ақ Назарбаев Университетінде қызметтерді конкурссыз сатып алу университеттің өз ережелеріне сәйкес жүргізілетіні айтылды. Бұл ережелер Қамқоршылық кеңесімен бекітілген.

Еске салсақ, Жоғары аудиторлық палата Назарбаев Университетінің қызметін талдап, бірқатар кемшілік анықтаған болатын. Оның ішінде университеттің республикалық бюджетке тәуелділігі мен қаржылық есеп ұсыну туралы заң нормаларының жоқтығы мәселелері айтылды.