Қазақстанның экс-президенті Н. Назарбаевты өзінің “ең жақын досы” дейтін Беларусь Президенті Александр Лукашенко досы секілді  республиканың қазіргі немесе бұрынғы президенті мен оның отбасы мүшелеріне қатысты жаңа заң қабылдауды ұсынды.

Лукашенко ұсынысы:

Лукашенко ұсынған заңда республиканың қазіргі немесе бұрынғы президентіне қатысты зорлық-зомбылық немесе мүлікке зиян келтіру қаупін тудырғаны үшін елде қылмыстық жаза енгізуді ұсынды. Мұндай қылмысқа үш жылдан сегіз жылға дейін бас бостандығынан айыруға болады. Бұл заңды Мемлекет басшысының отбасы мүшелерін қауіптен қорғау мақсатында енгізу ұсынылды.

Сонымен қатар түзетулер бұрынғы президентке жала жабу және қорлаған жағдайда да жауапкершілік тартуды көздейді. Ол үшін алты жылға дейін бас бостандығынан айыру жазасы тағайындалуы мүмкін.

Ұсынылған заңның Назарбаев заңына ұқсастығы:

Лукашенконың “сенімді досы”, Қазақстанның экс-президенті Назарбаев та осыған ұқсас заң жобасын дайындап, тіпті енгізген болатын. Ол “Тұңғыш президент – елбасы туралы заң” деп аталды.

Заңның 3-бабы “Қазақстан Республикасының Тұңғыш Президентіне –Елбасына ешкімнің тиіспеуі” туралы болды. Ол заңда “Президент және Елбасы болған кездегі әрекеттері үшін жауапкершілікке тартылмайды”,- деген иммунитет болды. Оған қоса, оны қамауға алуға, тергеп-тексеруге де тыйым салынған болатын. Ерекше “тиіспеу туралы” иммниутет оның отбасы мүшелеріне және олардың мүлкіне де қолданылды.

Лукашенко ұсынған “Президентке жала жабу және қорлаған жағдайда жауапкершілікке тарту” туралы заңға ұқсас экс-президент Назарбаев енгізген ҚР Қылмыстық кодекстің 373-бабында “Елбасының ар-намысын қорғау” туралы заң болған еді. Заңда Елбасын көпшілік алдында қорлауға, абыройы мен қадір-қасиетіне өзгедей қолсұғушылық болып немесе Елбасының бейнесін бүлдірген жағдайда 2000 АЕК айыппұл немесе сол мерзімге түзеу жұмыстарына тартуға, 2 жыл бас бостандығын шектеу немесе бас бостандығынан айыру жазасы тағайындалатын. Алайда бұл заң жобасы 2023 жылдың 12 шілдесінде алып тасталды.

Лукашенко түзетулерді ұсынған заң – Белоруссияның Қылмыстық кодексінің 366-368 баптары. Онда қазіргі президентке қауіп төндіргені үшін 3 жылдан 5 жылға дейін бас бостандығын шектеу немесе 3 жылдан 8 жылға дейін бас бостандығынан айыру жазасы көзделген. Енді бұл заң тек қазіргі президентке ғана емес, бұрынғы президентке қатысты да қолданылуы мүмкін. Сонымен қатар 367-бапты (президентке қатысты жала жабу) және БР Қылмыстық кодексінің 368-бабын (президентті қорлау) толықтыру ұсынылды.

30 жыл бойы билікте отырған Лукашенко 10 тамыз күні “жаңа президент” туралы ойға үйрене беруге кеңес берген болатын.