Наурыз туралы даулы пікірлерден кейін Бас прокуратура мәлімдеме жасады

Қазақстан Республикасының Бас прокуратурасы әлеуметтік желілерде Наурыз мерекесіне қатысты тараған даулы пікірлерден кейін азаматтарды жалған ақпарат таратпауға және қоғамдық алауыздыққа жол бермеуге шақырды.

Ведомствоның хабарлауынша, соңғы уақытта жекелеген тұлғалар ұлттық дәстүрлер мен әдет-ғұрыптарға, соның ішінде көпғасырлық тарихы бар Наурыз мейрамына қатысты теріс әрі бұрмаланған пікірлер таратқан. Прокуратура мұндай мәлімдемелер елдің зайырлы қағидаттарына қайшы келетінін және қоғамдық келісімге нұқсан келтіруі мүмкін екенін атап өтті.

«Көрінеу жалған ақпарат тарату Қазақстан Республикасы Қылмыстық кодексінің 274-бабына сәйкес жауаптылыққа әкеп соғады. Ал ұлттық, діни немесе өзге де алауыздықты қоздыру 174-бап бойынша қылмыстық жауапкершілікке жатады», – делінген Бас прокуратура хабарламасында.

Сондай-ақ ведомство журналистер мен блогерлерді кәсіби этиканы сақтауға, қоғамда жанжал туғызуы мүмкін идеяларды насихаттамауға шақырды. Құқық қорғау органдары мұндай заңбұзушылықтар анықталған жағдайда тиісті шаралар қабылдайтынын ескертті.

Бұған дейін әлеуметтік желілерде блогердің «Наурыз мерекесі қазаққа да, мұсылманға да тән емес» деген пікірі қоғамда резонанс тудырған еді. Кейін Ішкі істер министрлігі аталған материал бойынша діни алауыздықты қоздыру фактісімен қылмыстық іс қозғалғанын хабарлады.