«Нәтиже болмаса – қоштасамыз»: Бектенов Kazakh Tourism басшысына қатаң талап қойды

Қазақстан Премьер-министрі Олжас Бектенов Kazakh Tourism ұлттық компаниясы басқарма төрағасы Талғат Ғазизовтен нақты нәтижелер күтетінін ашық айтты. Бұл туралы Үкімет отырысы барысында белгілі болды.

Жиында Ғазизов елдің туристік әлеуетін халықаралық деңгейде ілгерілету бойынша атқарылған жұмыстар туралы баяндама жасады. Осыдан кейін Премьер-министр оның жуырда, 16 қаңтарда ғана тағайындалғанын еске сала отырып, жұмыс тиімділігіне қатысты қатаң талап қойды.

«Сіз жаңа қызметкерсіз. Бірақ соған қарамастан, біз нақты нәтижелерді күтеміз. Нәтиже болса – жұмысты жалғастырасыз. Болмаса – қоштасамыз. Келістік пе?» – деді Олжас Бектенов.

Премьер-министр туризм саласында өңірлерде белгілі бір оң серпін бар екенін атап өтті. Алайда кешенді тексерулер жүйелі мәселелердің әлі де көп екенін көрсеткен. Оның айтуынша, туристік нысандардың бірқатары сапалы интернетпен қамтылмаған, бұл бағыттағы жұмыстар баяу жүріп жатыр.

Сонымен қатар санитарлық-эпидемиологиялық талаптардың жиі бұзылуы, тиісті рұқсат құжаттарын алмау, көлік қолжетімділігінің төмендігі, қоқыс мәселесі, энергиямен қамту, тәулік бойы жұмыс істейтін жедел қызметтердің болмауы және қонақүй бағасының жоғары болуы да өзекті проблемалар қатарында аталды.

Осы мәселелерді шешу үшін Премьер-министр барлық өңір әкімдіктері, «Атамекен» ұлттық палатасы, туризм саласындағы ірі кәсіпкерлер мен сарапшылар қатысатын жедел үйлестіру кеңесін құруды тапсырды. Кеңесті Премьер-министрдің орынбасары – Мәдениет және ақпарат министрі Аида Балаева басқаратын болады.