Насыбаймен күрес басталып кетті

18 наурыздан бері елімізде «Насыбай» республикалық жедел-профилактикалық іс-шарасы аясында рейд жүргізіліп, заңмен тыйым салынған насыбайды сатушылар анықталып жатыр. 

Мәселен, 18 наурыз күні Петропавл қалалық полиция басқармасының учаскелік полиция инспекторлары орталық базарда насыбай сатқан 56 жастағы әйелді анықтады. 

Тексеру кезінде тәртіп сақшылары сатуға дайындалған 142 ораманы тауып, тәркіледі. Петропавл тұрғынына қатысты ҚР Әкімшілік құқық бұзушылық туралы кодекстің «Тауарлар мен басқа заттарды заңсыз сату» - 196 бабы бойынша әкімшілік хаттама жасалды. Заң бұзушыға 25 АЕК – 92 мың теңге шамасында айыппұл салынды.

Ал Атырау облыстық полиция департаментінің қызметкерлері Атырау қаласындағы Авангард шағынауданында орналасқан сауда орталықтарының бірінде Өзбекстан Республикасы азаматының насыбайды заңсыз сатқаны анықтады. Шетелдіктен арнайы пакетке салынған 340 насыбай алынды.

Еске сала кетейік, Президент Қасым-Жомарт Тоқаев Атырауда өткен Ұлттық құрылтайдың үшінші жиынында насыбай атуды денсаулыққа зиян әрі ұят әдеттің бірі екенін айтқан болатын.

«Оның қалай жасалатыны – белгілі, ешқандай санитарлық талап сақталмайды. Құрамында түрлі дертті, соның ішінде онкологиялық ауруларды қоздыратын заттар бар. Насыбайды өндіруге және таратуға 2015 жылы тыйым салынған. Бірақ әлі күнге дейін көшеде, тіпті азық-түлік дүкендерінде ашық сатылып жатыр. Құқық қорғау мекемелері ешқандай шара қолданып жатқан жоқ», – деген болатын Мемлекет басшысы.

«Насыбай» республикалық жедел-профилактикалық іс-шарасы 31 наурызға дейін жалғасады.