“Мұндай қасірет қайталанбауға тиіс”: Тоқаев атом қаруы сынағы жайында

Бүгін – Ядролық сынақтарға қарсы халықаралық іс-қимыл күні. Мемлекет басшысы Қасым-Жомарт Тоқаев осы атаулы күнге орай өз үндеуін жариялады.

Президенттің атап өтуінше, бұл күн БҰҰ Бас Ассамблеясының шешімімен Қазақстанның бастамасы бойынша бекітілген. Ол халқымыздың атом қаруы сынағынан қатты зардап шеккенін еске салып, мұндай қасірет қайталанбауы тиіс екенін айтты.

– Біз кейінгі ұрпақтың жарқын болашағы үшін бейбітшілікті нығайтып, халықаралық әріптестікті дамытуымыз қажет. Ядролық қарудан және сынақтардан түбегейлі бас тартуға күш салуымыз керек. Бейбітшілік пен қауіпсіздік – бүкіл адамзатқа ортақ ең басты құндылықтар, – деп жазды Қасым-Жомарт Тоқаев өзінің X парақшасында.

Айта кетейік, Қазақстан әлемде ядролық қарудан өз еркімен бас тартқан алғашқы мемлекеттердің бірі. Семей полигонының жабылуы да жаһандық қарусыздану ісіндегі маңызды тарихи қадам ретінде бағаланады.