Мұнаймен әуре болып, жарықсыз қалдық: Тоқаев энергетикадағы ақауларды сынады

Үкіметтің кеңейтілген отырысында Президент Қасым-Жомарт Тоқаев Қазақстанның энергетика саласындағы өзекті мәселелерді атап өтіп, Үкіметке нақты тапсырмалар жүктеді. Мемлекет басшысы электр энергиясының тапшылығы ел прогресіне үлкен кедергі болып отырғанын айтты.

Президенттің мәліметінше, елдегі дефицитті жабу үшін Қазақстан жыл сайын сырттан ток сатып алуға мәжбүр. Өткен жылы импорт көлемі 3,7 млрд киловатт-сағатты құраған.Соңғы үш жылда бұл бағдарлама аясында 1 трлн теңгеден астам қаражат бөлінген. Алайда оның басым бөлігі (900 млрд теңге) тек жөндеу жұмыстарына жұмсалып, жаңа генерацияны іске қосуға небәрі 140 млрд теңге бағытталған. Бұл жүйенің тұрақтылығын қамтамасыз етуге жеткіліксіз.

Тоқаев мырза Энергетика министрлігінің бұрынғы басшылығын тек мұнай мәселелерімен айналысып, электр энергиясын екінші жоспарға ысырып қойғаны үшін сынады. Сондай-ақ, Алматыдағы ЖЭО-2 және ЖЭО-3 нысандарын жаңғырту мерзімдерінің бірнеше рет кейінге шегерілгенін айтып, бұдан былай мерзімді созуға жол берілмейтінін ескертті.

«Негізгі мәселе — білікті мамандардың тапшылығында деп ойлаймын. Энергетика саласымен кім көрінген — бәрі қолынан келетіндей көретін өзіне тым сенімді дилетанттар айналыса бастады», - деді Президент.

Мемлекет басшысы Қытай мен АҚШ-тың тәжірибесіне тоқталып, Қазақстанның да «таза» көмір генерациясына көшуі керектігін айтты.

Қытай үлгісі: Көрші ел жалпы қуаты 55 гигаватт болатын 85 «таза» көмір энергоблогын салуда. Бұл — әлемдегі жаңа көмір энергия көздерінің 90%-ы.

Прагматизм: Президент көрші мемлекеттердің энергетикалық қауіпсіздікті бірінші орынға қойып, прагматикалық әрекет етіп жатқанын мысалға келтірді.

Цифрландыру және ЖИ

Мемлекет басшысы энергетика саласында жасанды интеллектті қолдана отырып, онлайн-мониторингті шұғыл енгізуді тапсырды. Оның айтуынша, ЖИ-сіз энергияны ұтымды пайдалану мүмкін емес.