Мұнай бағасының құлдырауы және теңгенің әлсіреуі: Венесуэладағы билік ауысуы Қазақстанға қалай әсер етеді?

Мұнай нарығы күту режиміне өтті. Сарапшылар Венесуэладағы жағдайдың халықаралық салдарын бағамдауға тырысуда. Мамандардың пікірінше, егер АҚШ-тың жоспары іске асып, олар Венесуэлада мұнай өндіру көлемін арттырып, оны нарыққа шығарса, «қара алтынның» бағасы күрт құлдырауы мүмкін. Мұнай котировкаларының төмендеуі Қазақстан экономикасы мен ұлттық валютаның жағдайына міндетті түрде әсер етеді, деп хабарлайды «31 арна».

Кеше америкалық валюта өсім көрсетті. Доллар 513–516 теңге аралығында сатылуда. Сарапшылардың айтуынша, қазіргі уақытта теңге бағамына мұнай құнынан басқа факторлардың әсері шамалы. Brent маркалы мұнайдың бағасы барреліне шамамен 61 доллар деңгейінде тұр. Нарық әзірге тұрақты болғанымен, ұзақ мерзімді перспективада АҚШ пен Венесуэла арасындағы шиеленіс бағаға қысым жасауы мүмкін.

«Бұл процесс бірнеше жылға созылуы мүмкін. Мүмкін, бір жылдан кейін ғана қандай да бір нәтиже байқалар. Әзірге тікелей әсер күтудің қажеті жоқ. Дегенмен, бұл ұзақ мерзімді инвестицияларға әсер етеді, яғни әлемдік мұнай бағасы төмендейді деп болжауға болады», – дейді «Ұлағат консалтинг групп» директоры Марат Қайырленов.