Мүмкіндігі шектеулі жандар үшін 16 мыңнан астам жұмыс орны ашылады

Қазақстан Республикасының Еңбек және халықты әлеуметтік қорғау министрлігі мүмкіндігі шектеулі азаматтарды еңбек нарығына тарту мақсатында кешенді шараларды күшейтті. Әлеуметтік кодекске сәйкес, елдегі ірі және орта кәсіпорындарға арнайы квоталар белгіленіп, жұмыс орындарын ұсыну міндеттелді.

Министрліктің ресми мәліметінше, 2026 жылы квоталау жүйесіне 2,6 мың жұмыс беруші тартылып, олар барлығы 16,7 мың жұмыс орнын дайындауы тиіс. Ведомство мамандары бұл бастаманың маңыздылығына тоқталып:

 «Бұл — мүмкіндігі шектеулі азаматтардың тұрақты табыс тауып қана қоймай, өздерінің кәсіби әлеуетін толыққанды іске асыруына жол ашатын нақты мүмкіндік», - деп атап өтті.

Ақпараттық ашықтықты қамтамасыз ету мақсатында квоталауға қатысатын барлық жұмыс берушілердің тізімі Электрондық еңбек биржасында (Enbek.kz) жарияланды. Тізім әр аудан мен қала бойынша бөлек көрсетілгендіктен, үміткерлерге өз тұрғылықты жерінен лайықты вакансия табу әлдеқайда жеңілдемек.

Министрлік өкілдері квоталау жүйесінің стратегиялық мәні туралы былай дейді:

«Квоталау — бұл тек бос жұмыс орындарын құру емес, бұл - әрбір адам сұранысқа ие болатын инклюзивті қоғамдық ортаны қалыптастырудың негізгі құралы. Біз бұдан былай 50-ден астам қызметкері бар кәсіпорындар үшін квотаны есептеуді автоматтандырып, бақылау тетіктерін жетілдіретін боламыз».

Сонымен қатар Карьералық орталықтар тарапынан жұмыс берушілерге үміткерлерді іріктеу бойынша практикалық және кеңестік қолдау көрсетілмек. Бұған дейін Қазақстанда инватакси қызметін алудың бірыңғай ережелері енгізілетіні де хабарланған болатын. Бұл шаралардың барлығы мүмкіндігі шектеулі жандардың әлеуметтік бейімделуі мен кедергісіз ортада еңбек етуіне бағытталған.