Мұхтар Шахановтың соңғы аманаты жарияланды

Қазақстанның халық жазушысы, көрнекті ақын Мұхтар Шахановтың жұбайы Ханшайым Шаханова Президент Қасым-Жомарт Тоқаевқа ресми үндеу жасады. Хаттың негізгі мазмұны ақынның соңғы аманатын орындауға қолдау көрсету мәселесіне арналған.

Үндеуде бүгінгі таңда Мұхтар Шахановтың денсаулық жағдайының күрделі екені және оның соңғы тілегі ретінде Отырар өңіріндегі Арыстанбаб кесенесінің іргесіне жерленуді өтінгені айтылған.

Ханшайым Шаханова өз хатында ақынның ұлттық руханият пен мемлекеттік тілдің мәртебесін көтеруге қосқан ерен еңбегін атап өтіп, бұл мәселенің қоғам үшін маңыздылығына тоқталды. Арыстанбаб кесенесі республикалық маңызы бар тарихи-мәдени ескерткіштер қатарына жататындықтан, жерлеу рәсімін өткізуге тиісті мемлекеттік рұқсат қажет.

Осыған байланысты автор Мемлекет басшысынан ҚР Мәдениет және ақпарат министрлігі мен Түркістан облысының әкімдігіне ақынның аманатын жүзеге асыру бойынша тиісті тапсырмалар беруді сұрады.

Қазіргі уақытта құзырлы органдар тарапынан бұл өтінішке қатысты ресми пікір білдірілген жоқ.