Мүгедектігі жоқ, бірақ есту қабілеті нашар адамдарға да есту протезі тегін беріледі

Қазақстанда халыққа сурдологиялық көмек көрсетудің жаңа тәртібі бекітілді. Денсаулық сақтау министрлігінің бұйрығымен енгізілген өзгерістер есту қабілеті бұзылған азаматтарға медициналық қолдау көрсетуді жеңілдетуді көздейді.

📌 Негізгі өзгерістер:

• Мүгедектігі бар адамдар есту аппараттары мен басқа да арнайы құралдарды мемлекет есебінен алады.

• Мүгедектігі жоқ, бірақ есту қабілетінде ақауы бар азаматтар да медициналық көрсетілімдер бойынша есту аппаратын ала алады. Бұл үшін жергілікті әкімдіктер шешім қабылдап, қаржыны жергілікті бюджеттен бөледі.

• Есту қабілеті 1–4 дәрежеде тұрақты бұзылған адамдарға есту аппараттарын беру және оларды уақытында ауыстыру қарастырылған.

• Есту аппараты немесе имплант алғандар алғашқы жылдары дәрігерде жиі тексерістен өтіп, процессорын баптатады:

  • бірінші жылы – кемінде 4 рет,

  • екінші жылы – кемінде 2 рет,

  • кейінгі жылдары – жылына кемінде 1 рет.

• Ортаңғы құлақ немесе сүйек өткізгіштік импланттарының сөйлеу процессорлары әр 5 жыл сайын ауыстырылады. Бұл да жергілікті бюджет есебінен жүзеге асады.