Мүгедек болып қалу қаупі бар: Оралда әскерден қашқан жігіт ауыр халде жатыр

1 желтоқсанға қараған түні төрт әскерге шақырылушы терезедегі темір торды бұзып, тоғыз жамылғыны бір-біріне байлап, үшінші қабаттан секіріп қашпақ болған. Осы сәтте 19 жастағы Мейрамбек Сейфоллаев ауыр жарақат алған. Бұл туралы Kazinform ақпараттық агенттігі хабарлады.

Облыстық Қорғаныс істері жөніндегі департамент бастығының орынбасары Альберт Бекмұхановтың айтуынша, оқиғаға байланысты ҚР Қылмыстық кодексінің 387-бабы («Әскери қызметтен жалтару») бойынша іс қозғалды. Аталған бап бойынша айыпты деп танылған адам бір мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына не төрт жүз сағатқа дейінгі мерзімге қоғамдық жұмыстарға тартуға не бір жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланады.

Қазіргі уақытта тергеу жұмыстары мен қызметтік тексеріс қатар жүргізіліп жатыр. Қашқан үш жас жігіттің екеуі келесі күні өз еркімен әскери бөлімге оралған.

Мейрамбек Сейфоллаевтың ағасы Нұрхат Әбілғазиевтің айтуынша, інісі психологиялық тұрғыдан әскери қызметке дайын болмаған. Үшінші қабаттан құлаған кезінде омыртқасы сынған, жұлыны зақымданған. Оның жағдайы өте ауыр, мүгедек болып қалу қаупі бар.

"Жедел жәрдемді белін қайырып алды деп шақырған. Үшінші қабаттан секірді дегенде, жедел жәрдем тез келетін еді. Олар келгенше, 1-1,5 сағаттай уақыт өткен. Қысқасы, әскери казарма қызметкерлерінің өз жұмысына салғырт қарағанына наразымын. Тағы бір айта кететін жайт, қашқандардың бірі Бексұлтан анасына хабарласып, әскерден алып қалуын өтінген. Әйтпесе «Қашамыз» деген. Бексұлтанның анасы Оралбай есімді әскери қызметшіге хабарласып, балалардың қашқысы келіп отырғанын ескерткен",  – деді Н.Әбілғазиев.

Қашқандардың бірі Әли Бейбіттің айтуынша, ол екі досын әскери қызметкерлер алып кеткенін естігеннен кейін, өз еркімен әскери комиссариатқа келген. Кейін үшеуі танымайтын бір адамның үгіттеуінен кейін қашуға шешім қабылдаған. Терезеден секіріп жатқанда жамылғы үзіліп кетіп, Мейрамбек жерге құлап, ауыр жарақат алған.

БҚО полиция департаменті бұл оқиға бойынша сотқа дейінгі тергеу жүргізіліп жатқанын хабарлады. Тергеу барысында қосымша ақпарат ҚР Қылмыстық іс жүргізу кодексінің 201-бабына сәйкес жария етілмейді.