Молдова ТМД құрамынан толық шығады

Молдова билігі Тәуелсіз Мемлекеттер Достастығынан толық шығу жөніндегі құқықтық үдерісті аяқтауға ниетті. Қазіргі таңда елдің ТМД-ға мүшелігін қамтамасыз етіп келген негізгі құжаттарды денонсациялау бекіту кезеңінде тұр. Бұл жөнінде вице-премьер әрі сыртқы істер министрі Михай Попшой хабарлады.

Оның айтуынша, ТМД-ны құру туралы 1991 жылғы келісім, оған қатысты қосымша құжаттар және 1993 жылы қабылданған Достастықтың Жарғысы күшін жоюға ұсынылып отыр. Аталған құжаттар Молдованың ұйымға мүшелігінің заңды негізін құраған.

Министрдің мәлімдеуінше, бұл қадам Молдованың ТМД-дан құқықтық тұрғыда ресми шығуын бекітеді.

«Біз іс жүзінде біршама уақыттан бері ұйым жұмысына қатысқан жоқпыз, алайда заң жүзінде мүшелік сақталып келді. Денонсация осы жағдайды түбегейлі өзгертеді», – деді ол «Радио Молдова» эфирінде.

Попшой шешімнің жуырда қабылданғанын, ал тиісті рәсімдер қазірдің өзінде басталғанын атап өтті. Үкімет деңгейіндегі жұмыс ақпан айының ортасына дейін аяқталып, одан кейін мәселе парламенттің қарауына ұсынылады.

Сонымен бірге, азаматтарға нақты пайда әкелетін ТМД аясындағы кейбір келісімдер күшінде қала бермек. Алайда қысқа мерзім ішінде Молдова ресми түрде Достастық мүшесі мәртебесінен айырылады.

Министрдің дерегінше, Молдова ТМД шеңберінде жалпы саны 283 келісімге қол қойған. Оның 71-і бұған дейін күшін жойған, ал шамамен 60 құжатты денонсациялау үдерісі жалғасып жатыр.

Айта кетейік, Молдова билігі ТМД-мен байланысты келісімдерді қайта қарауды Ресейдің Украинаға қарсы соғысы басталған 2022 жылдың ақпан айынан кейін жеделдеткен. Ел басшылығы көптеген құжаттар ескіргенін және тәжірибеде қолданылмағанын алға тартып отыр.