Minval: Ақтау маңында құлаған ұшақ Ресей бұйрығымен атып түсірілген

2024 жылғы 24 желтоқсанда Бакуден Грозныйға бет алған Azerbaijan Airlines әуе компаниясының Embraer 190 ұшағы Ақтау маңында апатқа ұшыраған болатын. Ұшақта болған 67 адамның 38-і қаза тапты, олардың басым бөлігі – Әзербайжан азаматтары. Енді бұл трагедияға қатысты жаңа деректер пайда болды.

Minval.az басылымы Ресей әуе-қорғаныс күштері капитанының түсініктемесі мен аудиожазбаларға сілтеме жасап, ұшақтың Ресей Қорғаныс министрлігінің тікелей бұйрығымен атып түсірілгенін хабарлады.

Ресейлік капитан Дмитрий Паладичуктың айтуынша, ол 24–25 желтоқсан аралығында Грозныйда жауынгерлік кезекшілік атқарған. 25 желтоқсанда таңғы 05:40-та №1 дайындық деңгейіне көшу туралы бұйрық алып, 08:11-де әуе нысанасын анықтаған.

«Маған телефон арқылы нысананы жою бұйрығы берілді», – делінген оның түсініктемесінде.

Тұман салдарынан нысана оптикалық құрылғылармен көрінбеген. Бірақ 08:13:30 кезінде алғашқы зымыран ұшырылған. Алайда нысанаға дәл тимей, 08:13:48-де жаңартылған координаттармен қайтадан оқ атылған.

Minval басылымы хаттың шынайылығын растамайды, бірақ бұл материалдар Әзербайжан құқық қорғау органдарының тергеуі үшін маңызды болуы мүмкін екенін атап өтеді. Кейіннен ресейлік ASTRA, «Агентство» және The Insider медиалары бұл хаттың шын екенін растаған.

Еске сала кетейік, ресми мәлімет бойынша, ұшақ апатына ресейлік зымыранның ұшу кезінде кездейсоқ тиюі себеп болған. Зымыран Ресей аумағына бағытталған украин дрондарына қарсы ұшырылған кезде әуе кеңістігінде Embraer 190 ұшағына тиіп кеткен.