Министрлік қазақстандық жүргізушілерге ескерту жасады

Көлік министрлігі жазғы демалыс маусымына байланысты республикалық маңызы бар автожолдарда қозғалыс қарқыны артқанын айтып, жүргізушілерді барынша мұқият болуға шақырды.

Ведомствоның мәліметінше, жол-көлік оқиғаларының 91 пайызы жол қозғалысы ережелерін өрескел бұзудан болады. Оның ішінде апаттардың 33 пайызы жылдамдықты шамадан тыс асырудан, 14 пайызы көлікті басқаруды жоғалтудан, ал 10 пайызы жол белгілерін елемеуден тіркелген.

Соған қарамастан, биылғы алғашқы алты айда республикалық маңызы бар автожолдардағы жол апаттарының саны 9 пайызға азайған. Былтыр осы кезеңде 1507 жол-көлік оқиғасы тіркелсе, биыл олардың саны 1371-ге дейін төмендеген.

Министрліктің хабарлауынша, осы уақытта жолдардағы көлік ағыны 37 пайызға артып, 22,3 миллион көлікке жеткен.

Ведомство апат санының азаюына орташа жылдамдықты бақылау жүйесінің енгізілуі, жол сапасының жақсаруы және жүргізушілерге арналған ақпараттық белгілер мен электронды тақталардың орнатылуы әсер еткенін атап өтті.