Міндетін дұрыс атқармаған мердігерлерге Алматыда жұмыс істеуге орын жоқ – Дархан Сатыбалды

Алматы әкімі Дархан Сатыбалды әлеуметтік нысандардың құрылысына, жол және қоғамдық кеңістіктерді дамытуға атсалысып жүрген мердігер компаниялардың басшыларымен кеңес өткізді.

Жиында қалада жүзеге асырылып жатқан 147 жобаның орындалу барысы талқыланды. Оның ішінде 26 нысанда жұмыс мерзімі кешіктіріліп, сапа талаптары сақталмаған.

Қала құрылысын бақылау басқармасының басшысы Олжас Төлебаевтың мәліметінше, мониторинг қорытындысы бойынша келісімшарт мерзімін жиі бұзып, құрылыс нормаларын орындамаған 9 мердігер анықталған. Олардың жұмысында ұйымдастырудағы кемшіліктер мен құжат жүргізудегі салғырттық жиі кездеседі.

Дархан Сатыбалдының айтуынша, мұндай жауапсыздық тұрғындар наразылығын тудырып отыр. Көпшілік мектеп пен балабақша құрылысының созылуына, саябақтар мен жағалауларды абаттандырудың баяу жүруіне және жолдардағы жөндеу жұмыстарының уақытында аяқталмауына шағымданған.

«Кейбір компаниялар бір нысанды аяқтамай жатып, жаңа жобаларды қолға алады. Мұндай әрекетке жол берілмеуі тиіс. Себебі сөз – қала тұрғындарының қауіпсіздігі мен өмір сапасы туралы болып отыр. Міндетін дұрыс атқармаған мердігерлерге Алматыда жұмыс істеуге орын жоқ», – деді қала әкімі.

Кеңес соңында Дархан Сатыбалды Қала құрылысын бақылау басқармасына нысандарды апта сайын тексеруді, талаптарды орындамаған мердігерлердің лицензиясын қайтарып алуды және қажет болған жағдайда материалдарды құқық қорғау органдарына жолдауды тапсырды.