Михаил Шайдоров жалақы мәселесін неге жария түрде көтергенін түсіндірді

Қазақстандық мәнерлеп сырғанаушы, Олимпиада чемпионы Михаил Шайдоров жалақының кешігуіне қатысты мәселені неге жария түрде көтергенін түсіндірді. Ол Threads әлеуметтік желісіндегі жазбасында қоғамның қолдауына алғыс айтып, кейбір түйткілдер көпшілікке айтылмайынша шешілмейтінін мәлімдеді.

«Кей мәселелерді жария түрде айтпайынша шешу мүмкін болмай тұрғаны өкінішті. Мен ешқандай мекемемен жанжалға барғым келмейді. Бірақ атымды көпшілік алдында қаралауға жол бере алмаймын», – деп жазды спортшы.

Шайдоровтың айтуынша, ол 2025 жылы әлем чемпионатында күміс медаль алғаннан кейін еңбек сіңірген спорт шебері нормативін орындаған. Алайда осы уақытқа дейін тиісті куәлігін алмаған. Сондай-ақ Милан Олимпиадасындағы жеңісі үшін берілетін сыйақы да әлі төленбеген. Дегенмен спортшы бұл мәселеге түсіністікпен қарайтынын жеткізді.

«Олимпиададағы жеңіс үшін берілетін сыйақыға қатысты сұрағым жоқ. Бұл белгілі бір уақытты қажет ететін рәсім екенін түсінемін және жұмыс жүріп жатқанына сенімдімін», – деді ол.

Спортшы жалақыға қатысты жағдайды да түсіндірді. Оның сөзінше, федерациямен келісім жасалғанымен, спортты қолдау қоры қаржыландыру мәселесін қарап жатқандықтан, өзі де, жаттықтырушылар командасы да бес айдан бері жалақы алмаған.

«Дирекция маған қаңтар айының және 2026 жылдың 22 ақпанына дейінгі кезеңнің жалақысын төледі. Бірақ одан кейін ешқандай төлем болған жоқ», – деді Олимпиада чемпионы.

Михаил Шайдоров жаңа келісімшартты талқылау тек мамыр айының ортасында басталғанын айтты. Оның сөзінше, құжаттағы кейбір талаптармен келісе алмай отыр.

«Келісімшартта 2026 жылдың соңына дейін күшінде болатын міндеттемелердің арасында 2030 жылғы Олимпиадада медаль жеңіп алу талабы көрсетілген. Бұл қисынсыз. Мен 2026 жылы төрт жылдан кейін өтетін Олимпиадада жеңіске жете алмаймын ғой», – деді спортшы.

Шайдоров бұл тармақты қайта қарауды сұрағанымен, әзірге ешкім байланысқа шықпағанын айтты. Сонымен қатар ақпан айынан бері жеке дәрігерсіз жүргенін және жаңа маусым алдындағы дайындыққа қатысты мәселелердің де шешілмегенін жеткізді.

«Менің жұмысым – күніне үш рет жаттығу жасау. Қазір де соны істеп жүрмін. Бірақ оқу-жаттығу жиындарының қалай қаржыландырылатыны, жол шығындары мен бағдарламаларды дайындау мәселесі әлі анық емес», – деді ол.

Олимпиада чемпионы егер маусымға қажетті қаржыландыру толық бөлініп, дайындық жұмыстары қамтамасыз етілсе, төленбей қалған жалақысының барлығын Балаларды қорғау күніне орай қайырымдылыққа жұмсауға дайын екенін мәлімдеді.

«Егер барлық мәселе шешіліп, маусымға қажетті қолдау көрсетілсе, төленбей қалған жалақымның барлығын балаларға көмек көрсетуге аударамын. Бұл мені қолдаған қазақстандықтарға ортақ сыйлық болсын», – деп түйіндеді Михаил Шайдоров.