Мемлекеттік органдар ақпараттық қауіпсіздік талаптарын жиі бұзады – Мәдиев

Бұл туралы Үкімет отырысында Премьер-министрдің орынбасары – жасанды интеллект және цифрлық даму министрі Жаслан Мәдиев мәлімдеді.

Министрдің айтуынша, 2025 жылы елде мемлекеттік органдарға қатысты тексерулер рекордтық деңгейде көп жүргізілген. Тексеру қорытындылары бірқатар ведомство мен ұйымның заңнамада белгіленген ақпараттық қауіпсіздік талаптарын жүйелі түрде бұзатынын көрсеткен.

– Барлық талап заңмен нақты бекітілген. Мемлекеттік органдардың ақпараттық жүйелерінен жеке деректердің таралуы үшін әрбір басшы жеке жауапкершілік арқалайды, – деді Жаслан Мадиев.

Ол сондай-ақ орталық мемлекеттік органдар мен әкімдіктерге ақпараттық жүйелердің қауіпсіздігін және азаматтардың дербес деректерінің сақталуын бақылауды күшейтуді тапсырды.

Министрдің сөзінше, цифрландыру үдерісі тереңдеген сайын деректердің қорғалуы мемлекет үшін стратегиялық маңызға ие болып отыр. Осыған байланысты ақпараттық қауіпсіздік талаптарын орындау формальді міндет емес, нақты жауапкершілік ретінде қарастырылуы тиіс.