Мемлекеттік қызметкерлер туған күнінде де сыйақы алуы мүмкін

Үкімет мемлекеттік қызметкерлерді марапаттау қағидаларын кеңейтті. Жаңартылған қаулы 1 қаңтардан бастап қолданысқа енгізіледі.

Енді сыйақы тек қызметтік көрсеткіштерге ғана емес, мерекелерге, мерейтойларға және жеке маңызды күндерге, соның ішінде туған күнге орай да берілуі мүмкін.

Құжатқа сәйкес, сыйақы төмендегі жағдайларда тағайындалады:

– қызметтік міндеттерін жоғары деңгейде орындағаны үшін;

– адал әрі мінсіз еңбегі үшін;

– күрделі және жауапты тапсырмаларды орындағаны үшін;

– белгілі бір кезеңдегі жұмыс нәтижелері бойынша;

– жедел немесе жоспардан тыс тапсырмаларды уақытылы әрі сапалы атқарғаны үшін;

– Мемлекет басшысы мен Үкімет жүктеген тапсырмаларды орындағаны үшін;

– лауазымдық міндетіне кірмеген жағдайда заң жобалары мен нормативтік-құқықтық актілерді әзірлеуге қатысқаны үшін.

Сыйақы тағайындау барысында қызметкердің жұмыс тиімділігі мен бағалау нәтижелері ескеріледі. Сонымен бірге әрбір мемлекеттік орган өз ішінде сыйақы беру талаптарын, көлемін және тәртібін дербес айқындай алады.