Мемлекеттік күзет қызметіне ескертусіз қару қолдануға рұқсат берілмек

Қазақстан Мәжілісі арнайы мемлекеттік органдардың қызметіне қатысты заңнамалық түзетулерді бірінші оқылымда қарап, мақұлдады. Жаңа заң жобасы аясында Мемлекеттік күзет қызметі (МКҚ) қызметкерлері мен әскерилеріне антитеррорлық операциялар кезінде қару мен техниканы ескертусіз қолдану құқығын беру ұсынылып отыр. Бұл жөнінде Власть басылымы жазды.

Мәжіліс сайтында жарияланған құжатқа сәйкес, МКҚ қызметкерлері қажетті қорғаныс немесе құқық бұзушыны ұстау кезінде арнайы құралдар немесе қару болмаған жағдайда, «кез келген қолда бар заттарды», сондай-ақ арсеналда жоқ өзге де қару түрлерін пайдалануға құқылы болады. Сонымен қатар террорға қарсы операция аймағында физикалық күш, арнайы құралдар мен жауынгерлік техниканы қолдану кезінде қолданыстағы заңдарда қарастырылған ескертулер мен шектеулер алынып тасталуы мүмкін.

Депутат Болат Керімбектің айтуынша, заң жобасы тек күш қолдану өкілеттігін ғана емес, сонымен қатар арнайы органдарға IT-мамандар мен талантты жастарды тарту тетіктерін де қарастырады. Құжатта мемлекеттік құпияларды қорғауды күшейтуге ерекше мән берілген. Атап айтқанда, «мемлекеттік құпияларды қорғау деңгейінің төмендеуі» ұлттық қауіпсіздікке төнетін қатерлердің бірі ретінде бекітілмек.

Заң жобасының тағы бір маңызды тұсы – экстремистік және террористік материалдарды әкелуге, басып шығаруға және таратуға ғана емес, оларды сақтауға да тыйым салу ұсынылып отыр. Сондай-ақ, мемлекеттік құпияларды қорғау талаптарын бір жыл ішінде қайталап бұзғаны үшін әкімшілік жауапкершілікті қатаңдату көзделген. Енді Мемлекеттік күзет қызметі орындалмаған нұсқамалар бойынша әкімшілік құқық бұзушылық туралы хаттама толтыруға құқылы болады.