Мемлекеттік аудиттен соң 28 шенеунік жауапқа тартылды

Жоғары аудиторлық палата ветеринариялық, фитосанитариялық және азық-түлік қауіпсіздігін қамтамасыз ету саласында жүргізген тексерістен кейін 28 адам тәртіптік жауапқа тартылды.

Аудит биыл тамыз айында өткізілген. Тексеру барысында бюджет пен өзге де заңнамалардың талаптарын бұзу, бақылау мен жоспарлаудағы кемшіліктер және ведомствоаралық үйлестірудің әлсіздігі анықталған. Осыған байланысты Жоғары аудиторлық палата жауапты тұлғалардың қызметтік жауапкершілігін қарауды тапсырған.

Нәтижесінде 28 лауазымды тұлғаға түрлі деңгейде тәртіптік шаралар қолданылды.

ҚР Ауыл шаруашылығы министрлігі жүйесінде:
– Стратегиялық жоспарлау және талдау департаментінің директоры,
– Ғылыми қамтамасыз ету, ішкі сауда және микрокредиттеуді мониторингтеу басқармаларының басшылары.

Ветеринариялық бақылау және қадағалау комитетінде:
– Комитет төрағасының орынбасары,
– Тамақ өнімдерінің қауіпсіздігі және биологиялық қауіпсіздік басқармаларының басшылары,
– «Республикалық ветеринариялық зертхана» ШЖҚ РМК бас директорының орынбасары.

Агроөнеркәсіптік кешендегі мемлекеттік инспекция комитетінде:
– Комитет төрағасының орынбасары,
– Жамбыл облыстық аумақтық инспекциясының басшысы,
– Алматы қаласы бойынша аумақтық инспекцияның бухгалтерлік есеп бөлімінің басшысы.

«Азық-түлік келісімшарт корпорациясы» ҰК» АҚ-да:
– Ауыл шаруашылығы өнімдерін есепке алу және сақтау департаментінің директоры,
– Басқарушы директор – Басқарма мүшесі.

Ғылыми-зерттеу ұйымдарында:
– Қазақстан егіншілік және өсімдік шаруашылығы ғылыми-зерттеу институтының басқарма төрағасының ғылым жөніндегі орынбасары, бас экономист, бас бухгалтер және майлы дақылдар зертханасының меңгерушісі;
– Қазақстан қайта өңдеу және тағам өнеркәсібі ғылыми-зерттеу институтының бас ғылыми қызметкерлері, бас инженері және Семей филиалының бухгалтері;
– С. Сейфуллин атындағы Қазақ агротехникалық зерттеу университетінің ғылым және инновациялар департаменті директорының орынбасары.

Әлеуметтік-кәсіпкерлік корпорациялар ішінде:
– «Павлодар» ӘКК кредит беру және активтерді басқару департаментінің директоры,
– «Тобыл» ӘКК инвестициялық жобалар және индустриялық аймақты дамыту департаменті директорының міндетін атқарушы,
– «Солтүстік» және «KOKSHE» ӘКК жауапты қызметкерлері тәртіптік жазаға тартылды.