Мемлекеттік аудиттен кейін спорт жүйесінде реформа басталды

Елімізде спорт саласында тәртіп пен ашықтықты арттыруға бағытталған жаңа шаралар қабылданды. 

Жоғары аудиторлық палатаның тексеру қорытындысы бойынша спортшыларды тәрбиелеу және даярлау жүйесінде бірқатар кемшілік анықталып, оларды жою бойынша нақты тапсырмалар берілді.

Мемлекет басшысы Қасым-Жомарт Тоқаевтың спорт саласында тәртіп орнату жөніндегі саясаты аясында биыл сәуірде жаңа заң қабылданған болатын. Құжатта басым спорт түрлерін бекіту тәртібі қайта қаралып, бюджет есебінен шетелдік легионерлерді қаржыландыруға тыйым салынды.

Жазда жүргізілген мемлекеттік аудит нәтижесінде спорттық резервті қалыптастыру және талантты жастарды іріктеу жүйесінде де кемшіліктер анықталды.

Жаңа бастама

Жоғары аудиторлық палатаның тапсырмасы бойынша Туризм және спорт министрлігі мектептерде арнайы спорт сыныптарын ашу туралы шешім қабылдады.

Бұл сыныптар спортқа бейімі бар балаларды іріктеп, оқу мен жаттығуды қатар жүргізуге мүмкіндік береді. Іріктеуге дене тәрбиесі пәні мұғалімдері мен спорттық ұйымдардың жаттықтырушылары бірлесіп қатысады.

Қазіргі таңда ел мектептерінде 32 мыңнан астам дене шынықтыру пәнінің мұғалімі жұмыс істейді. Бұған дейін олардың әлеуеті спорттық резервті қалыптастыруда толық пайдаланылмаған. Енді бұл жүйе өзгермек.

Қаржы және есеп саласында тәртіп орнайды

Министрлікке қарасты ұйымдарда бухгалтерлік есеп пен есептілікті жетілдіру шаралары қолға алынды. Бұл — қаржының ашықтығын арттыруға, жеке жауапкершілікті күшейтуге және бюджет қаражатын тиімді бақылауға бағытталған.

Тәртіптік жауапкершілік

Мемлекеттік аудит қорытындысы бойынша бірқатар мекеменің лауазымды тұлғалары жауапқа тартылды. Олардың қатарында:

• – Спорт және дене шынықтыру істері комитеті;

• – «Спортты дамыту дирекциясы» РМК;

• – «Республикалық спорт колледжі» РМК;

• – Қажымұқан Мұңайтпасов атындағы спорт-интернат-колледж;

• – «Алматы олимпиадалық даярлық орталығы» РМК;

• – «Алатау» қысқы спорт түрлерінің республикалық шеберлік мектебі.

Мемлекет спорт резервін даярлау жүйесін қайта қалыптастырып, қаржылық бақылау мен есепті күшейтуге кірісті.
Бұл қадамдар елдегі спорт саласының ашықтығын арттырып, жас спортшыларды даярлаудың тиімділігін күшейтпек.

Жоғары аудиторлық палата спорт саласына қатысты өзге тапсырмалардың орындалуын қатаң бақылауда ұстайтынын мәлімдеді.