Мемлекетке 2 млрд теңгеге жуық залал келтірген «Қазселденқорғаудың» экс-басшысы 12 жылға сотталды

Алматы облысында қазылар алқасы бұрынғы Жамбыл облысының әкімі әрі «Қазселденқорғау» мемлекеттік мекемесінің бұрынғы басшысы Кәрім Көкірекбаевқа қатысты жаңа үкім шығарды. Бұл туралы облыстық соттың баспасөз қызметі хабарлады.

Іс материалдарына сәйкес, Көкірекбаев орынбасарымен бірге мердігер компания басшысынан орындалмаған жұмыстар бойынша актілерге кедергісіз қол қою үшін пара алған. Нәтижесінде мемлекетке 1,9 миллиард теңге көлемінде залал келтірілген.

Сот үкімі бойынша:

• Кәрім Көкірекбаев 12 жылға бас бостандығынан айырылды;

• Орынбасары мен кәсіпкер әрқайсысы 11 жылдан жаза алды;

• Үшеуі де өмір бойына мемлекеттік қызметте жұмыс істеу құқығынан айырылды.

Аталған үкім әзірге заңды күшіне енген жоқ.

Кәрім Көкірекбаев 2013–2018 жылдар аралығында Жамбыл облысының әкімі болған. 2019 жылы «Қазселденқорғау» мекемесін басқарған. Оны 2022 жылдың желтоқсанында ұстаған.

Еске сала кетейік, 2024 жылдың 7 шілдесінде алқабилер соты Көкірекбаевты ақтаған болатын. Алайда келесі күні Бас прокуратура үкімге наразылық білдіретінін мәлімдеді. Соның негізінде сот алқасы үкімді бұзып, істі қайта қарауға жіберді. Енді сол істің нәтижесі бойынша Көкірекбаев пен сыбайластары нақты мерзімге сотталды.