Түркістандағы БАҚ өкілдеріне Президент атынан су жаңа пәтер кілттері табысталды

Кәсіби мереке қарсаңында Түркістан облысында бұқаралық ақпарат құралдары саласының қызметкерлеріне Мемлекет басшысы Қасым-Жомарт Тоқаевтың атынан жаңа пәтерлердің кілті салтанатты түрде табысталды. Бұл шара Президенттің еліміздегі республикалық қана емес, өңірлік БАҚ өкілдерінің де әлеуметтік жағдайын жақсартуға бағытталған тікелей тапсырмасы аясында жүзеге асырылып отыр, деп хабарлайды Түркістан облысы әкімінің баспасөз қызметі.

Салтанатты рәсімде Түркістан облысының әкімі Нұралхан Көшеров Мемлекет басшысының атынан жаңа пәтерлердің кілтін иелеріне табыстап, журналистер қауымын кәсіби мерекесімен құттықтады.

Президент бастамасымен баспаналы болғандардың қатарында көпжылдық еңбегі еленген азаматтар бар:

 Ерболат Әбішов – «24KZ» телеарнасының Түркістан облысындағы телеоператоры. Саладағы еңбек жолын 2000 жылы Қазығұрт аудандық телеарнасында бастап, кейін облыстық және республикалық арналарда қызмет атқарған. 2012 жылдан бері «Хабар» агенттігінде ел өмірінің маңызды сәттерін кәсіби деңгейде таспалап келе жатқан маманға Түркістан қаласынан қажетті жиһазбен толық жабдықталған жаңа пәтер берілді.

 
Нұрсұлтан Шертаев – Созақ аудандық «Созақ үні» қоғамдық-саяси газетінің жауапты хатшысы. Әл-Фараби атындағы Қазақ ұлттық университетінің журналистика факультетін бітірген маман 13 жыл бойы аудандық басылымда өңірдің әлеуметтік-экономикалық дамуы мен елдік бастамаларын үздіксіз насихаттап келеді. Ол Президент бастамасы аясында өз туған өлкесі – Созақ ауданынан баспаналы болды.

Облыс әкімі Нұралхан Көшеров өз сөзінде:

«Президентіміз Қасым-Жомарт Кемелұлы Тоқаев ақпарат саласы қызметкерлерінің еңбегін әрдайым жоғары бағалап келеді. Бүгін Мемлекет басшысының атынан өздеріңізге баспана кілтін табыстау – зор мәртебе. Бұл – журналистердің қоғамдағы рөлін айқындайтын, олардың әлеуметтік жағдайын жақсартуға бағытталған нақты қолдау», – деп атап өтті. 

Аймақ басшысының құттықтау сөзінің толық мәтінімен облыстық «Оңтүстік Қазақстан» газетінің ресми сайтынан танысуға болады.

Ресми деректерге сүйенсек, соңғы жылдары БАҚ қызметкерлерін әлеуметтік қолдау шаралары жүйелі түрде жүзеге асырылып келеді. Бұл бастама медиа мамандарының әлеуметтік әл-ауқатын арттырумен қатар, олардың кәсіби қызметіне жаңа серпін беріп, ел дамуы жолындағы жауапты міндеттерді сапалы атқаруына берік негіз қалайды.