Мемлекет басшысы Мәжіліс Төрағасы Ерлан Қошановты қабылдады

Қасым-Жомарт Тоқаев Мәжіліс Төрағасы Ерлан Қошановпен кездесті. Кездесу барысында Палатаның заң шығару қызметі мен депутаттардың негізгі жұмыс бағыттары талқыланды, деп хабарлады Ақорда.

Ерлан Қошанов Мемлекет басшысына Мәжілістің атқарған жұмысы мен қаралып жатқан заң жобалары туралы баяндап, Парламенттің басым бағыттарына тоқталды.

🔹 Заң шығару үдерісі:
Осы жылы Мәжіліс 15 заңды қабылдап, Сенатқа жолдаған. Қазір Палатаның қарауында 77 заң жобасы бар. Жыл соңына дейін Құрылыс және Цифрлық кодекстер, сондай-ақ «Банк қызметі туралы» Заң қабылданады деп жоспарланып отыр. Бұдан өзге, сайлау, тұтынушылардың құқықтарын қорғау және құқық бұзушылықтың алдын алу мәселелеріне қатысты заң жобалары қарастырылып жатыр.

🔹 Депутаттық бастамалар:
Халық қалаулылары жергілікті мемлекеттік және өзін-өзі басқару туралы заңнамаға түзетулер енгізуді, сондай-ақ креативті индустрияны, ғылыми зерттеу аймақтарын, тарихи-мәдени мұра нысандарын қорғау мен бағбандық шаруашылық серіктестіктерін қолдау салаларын дамытуға бағытталған заң жобаларын ұсынды.

Ерлан Қошановтың айтуынша, заң шығару процесі ашық форматта өтіп жатыр. Талқылауларға қоғам өкілдері, сарапшылар мен БАҚ қатысып келеді. Барлық партия өз сайлаушыларының мүддесін ескере отырып, бастамалар енгізіп жатыр. Маңызды заң жобалары Қоғамдық палатаның талқылауына шығарылады.

🔹 Инновация және жасанды интеллект:
Мәжіліс депутаттары Президенттің жасанды интеллект жөніндегі бастамаларын қолдап отыр. Қыркүйек айының соңында Мәжіліс «Жасанды интеллект туралы» Заңды қабылдап, оны Сенаттың қарауына жіберді. Сондай-ақ отандық және шетелдік сарапшылардың қатысуымен тақырыптық парламенттік тыңдау ұйымдастырылды.

Энергетика министрлігі және депутаттардың бастамасымен Ақтауда мұнай-газ машина жасау форумы өтіп, саладағы қазақстандық үлесті арттыру мәселесі көтерілді.

🔹 Парламенттік дипломатия:
Кездесуде халықаралық бағыттағы жұмыстар да сөз болды. Биыл Қазақстанға Моңғолия Ұлы Мемлекеттік Хуралының және Мажарстан Мемлекеттік жиналысының төрағалары ресми сапармен келді. Мәжіліс көптеген елдердің парламенттерімен достық топтары арқылы ынтымақтастықты нығайтып, тәжірибе алмасып келеді.

Сондай-ақ депутаттар ҰҚШҰ Парламенттік Ассамблеясы, ТүркПА, ТМД Парламентаралық Ассамблеясы және өзге де халықаралық ұйымдар аясында белсенді жұмыс істеп жатыр.