Мемлекет басшысы Қасым-Жомарт Тоқаев Көбейтұз көлін қорғау бойынша шаралар қабылдауды тапсырды

Мемлекет басшысы Қасым-Жомарт Тоқаевтың тапсырмасына сәйкес, суының бірегей қызғылт түсімен белгілі Көбейтұз көлін сақтау және қорғау бойынша кешенді шаралар қолға алынды. Бұл туралы Ақмола облысының әкімдігі хабарлады.

Экожүйені тиімді қорғау мақсатында «Бұйратау» мемлекеттік ұлттық табиғи паркінің аумағы кеңейтіліп, оның құрамына Көбейтұз көлінің акваториясы енгізілмек. Бұл қадам еліміздің жаңа Конституциясында айқындалған жоғары экологиялық мәдениетті қалыптастыру қағидаттарына және «Таза Қазақстан» жалпыұлттық экологиялық бастамасына толықтай сәйкес келеді.

Елордадан 160 шақырым жерде орналасқан нысанда туристер ағынының артуына байланысты Ақмола облысының әкімдігі жағалауды абаттандыру жұмыстарын бастайды. Мұнда нәзік экожүйеге зиян келтірмейтін арнайы автотұрақ пен бақылау алаңы салынып, келушілердің қауіпсіз суретке түсуіне жағдай жасалады.

Сонымен қатар, жүргізілген гидрохимиялық сараптама қорытындысы бойынша көл суындағы аммонийлі азот, аммиак, хлоридтер, мышьяк және сульфаттар мөлшерінің шекті рұқсат етілген концентрациядан жоғары екені анықталды. Осыған байланысты көлде шомылуға және оның жағалауынан тұз жинауға қатаң тыйым салынады.

Абаттандыру жұмыстары кезінде Көбейтұз көліне қолжетімділік уақытша шектеледі. Жағалау сызығында тәулік бойы бақылау бекеттері жұмыс істеп, полиция қызметкерлері мен уәкілетті органдар бірлесіп патрульдеу жүргізеді. Жергілікті билік тұрғындар мен қонақтарды табиғат қорғау заңнамасын қатаң сақтауға шақырады.