Мектепке дайындық: осал санаттағы жарты миллионға жуық бала материалдық көмек алады

Биыл Жалпыға бірдей білім беру қоры 500 мыңнан астам осал санаттағы балаға киім-кешек пен оқу құралдарын алу үшін материалдық көмек көрсетеді. Олардың қатарында атаулы әлеуметтік көмек алатын отбасының мектеп оқушылары, жан басына шаққандағы орташа табысы ең төменгі күнкөріс деңгейінен төмен отбасының балалары, сондай-ақ жетім балалар мен төтенше жағдайға тап болған отбасының балалары бар.

Әрбір білім алушыға 43 407 теңге қаражат белгіленген. Соңғы үш жылда материалдық көмек көлемі 2,5 есеге, яғни 17 мыңнан 43,5 мың теңгеге дейін өскен.

Балалардың құқықтарын қорғау комитетінің төрағасы Насымжан Оспанованың айтуынша, Оқу-ағарту министрлігі қаражатты ата-аналарлдың есепшотына аударады. 

"Бұл ата-аналар мен балаларға киім-кешек пен мектеп керек-жарақтарын жеткізушілерді өз бетінше таңдауға мүмкіндік береді, осылайша сапасыз тауарларды алуды болдырмайды", – деді Оспанова.

Осы уақытқа дейін 77,8 мыңнан астам баланың ата-анасының есепшотына 3,4 млрд теңгеден астам қаражат аударылды.