Мектеп оқушысына 300 мың ұсынып, азғырған адам жеңіл жазамен құтылып кетті

Алматыда 13 жастағы мектеп оқушысына ақша ұсынып, өзімен бірге кетуді ұсынған ер адам 10 тәулікке қамалды. Бұл туралы қалалық Полиция департаменті хабарлады.

Оқиға 9 қараша күні №50 мектептің жанындағы аялдамада болған. Белгісіз ер адам қызға алғашқыда қолма-қол 100 мың теңге ұсынып, таксимен бірге кетуді сұраған. Қыз оның әрекетінен қорқатынын айтқан кезде, ер адам керісінше “қорқатын ештеңе жоқ” деп сендірмек болып, “Сен маған ұнайсың” деген.

Жасөспірім бас тартқаннан кейін ол соманы 300 мың теңгеге дейін көтерген. Оқушы қыз жағдайды видеоға түсіріп, желіге жариялаған. Кадрлар қоғамда резонанс тудырды.

Полиция ер адамды анықтап, қолға түсірген. Оған қатысты әкімшілік іс қозғалып, сот шешімімен ол 10 тәулікке әкімшілік қамауға алынған.

Оқу-ағарту министрлігі жанындағы Балалар құқықтарын қорғау комитеті қыздың анасына хабарласып, психологиялық қолдау мен заңгерлік кеңес көрсетілгенін мәлімдеді.