Мектеп ашылмай жатып шатыр құлады: мердігер бюджетке 266 млн теңге қайтарады

Қостанай қаласында салынып жатқан мектептің спортзалында шатыр құлағаннан кейін мердігер компания 266 миллион теңгеден астам қаржыны өтеуге міндеттелді. Сот апаттың жобалық және құрылыс нормаларының бұзылуынан болғанын анықтады. Бұл туралы Жоғарғы соттың баспасөз қызметі хабарлады.

Әңгіме Қостанайдағы «Қонай» шағынауданында орналасқан жаңа мектеп туралы. Оқиға жөнінде бұған дейін «ТоболИнфо» басылымы жазған.

Сот материалдарына сәйкес, 2021 жылы мемлекеттік орган мердігер ЖШС-мен жалпы құны 2,2 млрд теңге болатын білім беру нысанын салу туралы келісімшарт жасаған. Құжатқа сай мектеп 2023 жылдың 31 желтоқсанына дейін пайдалануға берілуі тиіс болған. Алайда белгіленген мерзімде нысан іске қосылмаған.

Жергілікті басылымның жазуынша, мердігер жұмысты ғимаратта жылу болмауына байланысты тоқтатқан. Құрылысшылардың айтуынша, ғимаратта «қатты суық» болғандықтан әрлеу жұмыстары мен жабдықтарды орнатуды жалғастыру мүмкін болмаған.

2024 жылғы қаңтарда мектептің спортзалында шатыр құлаған. Сот хабарламасында техникалық қорытындыға сәйкес, апатқа фермаға түсетін көлденең жүктеменің жол берілмейтін деңгейге жетуі себеп болғаны айтылған. Бұл дәнекер тігісінің бұзылуына және тірек конструкцияларының деформациялануына әкелген. Аталған жайттар жобалық құжаттама мен құрылыс талаптарының сақталмағанын көрсетеді.

БАҚ дерегінше, 2024 жылғы 3 қаңтарда спортзалдағы бағаналардың бірінде зақым анықталып, бетон конструкциясының бір бөлігі үгіліп, қабырға фрагменті жұлынып кеткен. Осыдан кейін шатырдың бір бөлігі опырылған.

Апат салдарын жою үшін тапсырыс беруші авторлық және техникалық қадағалау, сондай-ақ құрылыс жұмыстарын аяқтау бойынша қосымша келісімшарттар жасаған. Бұл жұмыстардың жалпы құны 266 млн теңгеден асқан. Мемлекеттік орган бұл шығынды мердігерден өндіріп алуды талап еткен.

Мердігер компания өкілі талаппен келіспей, фермаларға түскен артық жүктеме құбырлардағы судың қатып қалуынан пайда болғанын алға тартқан. Оның айтуынша, жылымық кезінде шатырды су басып, патрубкаларды мұз бітеген. Мұның себебі ретінде ғимаратта жылудың болмауын көрсетіп, инженерлік желілердің уақытында қосылмағаны үшін жауапкершілікті тапсырыс берушіге жүктеуге тырысқан.

Алайда сот бұл уәждерді қабылдамады. Шешімде келісімшарт талаптарына сәйкес мердігер орындалған жұмыстың сапасына, пайдаланылған материалдарға және құрылыстың жобалық әрі техникалық талаптарға сәйкестігіне толық жауапты екені көрсетілген. Сондай-ақ компания конструкциялардың сенімділігі мен қауіпсіздігіне кепілдік берген және шарт талаптары тиісінше орындалмаған жағдайда келтірілген шығынды өтеуге міндеттенген.

Сот ықтимал пайдалану және климаттық факторларды мердігер жобалау және құрылыс кезеңінде ескеруге тиіс екенін атап өтті. Мұндай жағдайлар конструктивтік ақаулар үшін жауапкершіліктен босатпайды.

Нәтижесінде талап толық қанағаттандырылып, мердігер облыстық бюджетке 266 млн теңгеден астам қаржы – сараптамаларға, апат салдарын жоюға және мектеп құрылысын аяқтауға кеткен шығынды өтеуге міндеттелді. Сот шешімі әзірге заңды күшіне енген жоқ.