«Медеу» мұз айдынының реконструкциясына үш жыл кетеді

Премьер-министр Олжас Бектенов сенаторлардың сауалына жауап бере отырып, «Медеу» мұз айдынын қайта жаңғырту жұмыстары 2025-2027 жылдарға жоспарланғанын мәлімдеді. Бұл Алматы қаласының 2025 жылға дейінгі даму бағдарламасы мен 2030 жылға дейінгі орта мерзімді жоспары аясында жүзеге асырылады.

Сенаторлар 2023 жылдың желтоқсанында Үкімет басшысына арнайы хат жолдап, «Медеудің» ерекше спорттық мұра ретінде сақталуына қолдау білдіруді сұраған еді. Олардың пікірінше, ашық мұз айдынында халықаралық жарыстар өткізу мүмкіндігі төмен, себебі Халықаралық конькимен жүгірушілер одағы (ISU) ресми турнирлерді тек жабық ареналарда ұйымдастыруды талап етеді.

«Медеуді» халықаралық аренаға қайтару жоспары

Сенаторлар «Медеу» кешеніне ISU-дың ерекше мәртебесін алып беру бастамасын көтеріп, келесі ұсыныстарын ұсынды:
✔️ Конькишілер мен басқа спортшылар үшін  Биік таулы спорттық дайындық орталығын құру.
✔️ Хоккей мен бэнди жарыстарын өткізу.
✔️ Мұзды шоулар мен әлемдік мәнерлеп сырғанаушылардың өнерін көрсету.
✔️ Мұзды спидвей чемпионаттарын ұйымдастыру.

«Медеуді» халықаралық спорт картасына қайта енгізу жаңа рекордтарға жол ашып, Қазақстанның әлемдік аренадағы беделін арттырады. Сонымен қатар бұл туристік тартымдылықты күшейтудің тиімді жолы», – деп санайды сенаторлар.

Реконструкциядан кейінгі өзгерістер

Премьер-министрдің айтуынша, қайта жаңғырту жұмыстары айдынның техникалық мүмкіндіктерін жетілдіруге бағытталған. Жаңартылған «Медеу» ISU талаптарына сәйкес келіп, конькимен жүгіру мен мәнерлеп сырғанаудан халықаралық жарыстар өткізуге мүмкіндік береді.

Сондай-ақ Алматы әкімдігі мұзайдынның көпфункционалды мүмкіндіктерін кеңейтуді жоспарлап отыр. Жаңа форматта бэнди (допты хоккей), мұзды спидвей, мәдени-спорттық шаралар, мұзды шоулар өткізуге мүмкіндік жасалады.