Медбикелердің науқастарды емдеуге құқығы бар ма: Министрлік жауап берді

Қазақстанда емханаларда енді науқастарды тек дәрігерлер ғана емес, медбикелер де қабылдайды. Бұл туралы Денсаулық сақтау министрлігі хабарлады.

Ведомствоның мәліметінше, елімізде көпдеңгейлі кәсіби өсу жүйесі енгізіліп жатыр: кіші медбике – жалпы практикадағы медбике – кеңейтілген өкілеттігі бар медбике. Жаңа форматтағы медбике дәрігердің тең құқылы серіктесіне айналуы тиіс.

Мейіргерлік қабылдаудың артықшылықтары – дәрігерге кезектің қысқаруы, науқастардың уақытын үнемдеу, ауыр халдегі пациенттерге дәрігердің көбірек көңіл бөлуі және талдауларға жолдаманы жедел алу мүмкіндігі.

Министрлік медбикелердің қызметін былай түсіндірді: олар дәрігерлік емес, мейіргерлік диагноз қояды. Ол диагнозда ұзаққа созылған жөтел, қышыну, жоғары қан қысымы сияқты белгілер сипатталады. Медбике дәрігерге дейінгі тексеру жүргізе алады, оның ішінде ауыз қуысы мен сүт бездерін қарау, пациенттерді сауалнамалау, семіздік деңгейін анықтау, қан қысымын өлшеу, кардиограмма және басқа зерттеулерге жолдама беру кіреді.

Сондай-ақ медбикелер қант диабеті сияқты созылмалы аурулары бар науқастарды бақылап, қантты қадағалау мен тамақтану бойынша кеңес бере алады. Олар пациенттерді скринингтер мен вакцинацияға шақырып, созылмалы дертпен тіркеуде тұрғандарға жеке бақылау жоспарын жасай алады.

Дәрі-дәрмек тағайындау құқығы медбикелерде жоқ, бірақ олар дәрігер бұрын жазып берген препараттарға электрондық рецепт рәсімдей алады. Сонымен қатар дұрыс тамақтану, күтіну және созылмалы аурулардың асқынуының алдын алу бойынша білім бере алады.