Мәжілісмен Базарбек: Сенат адал емес құрылысшыларды бақылаудан шығарып отыр

Мәжіліс депутаты Бақытжан Базарбек Сенат жаңа Құрылыс кодексінен адал емес құрылыс компанияларының бірыңғай тізімін енгізу туралы норманы алып тастауды ұсынып отыр деп мәлімдеді.

Оның айтуынша, Мәжіліс қарашаның соңында қабылдаған кодекс жобасында бұл тізім алғаш рет заңды түрде бекітілуі тиіс болған. Тізімге адамдарды алдап, рұқсатсыз немесе заңсыз құрылыс жүргізген, құжатсыз жұмыс істеген компаниялар енгізіліп, олар үш жылға құрылыс қызметінен шеттетілетін.

«Бұл норма алғаш рет адамдарды алдаған, заңсыз құрылыс салған, рұқсатсыз жұмыс істеген компанияларға қатысты нақты жауапкершілік енгізуді көздеген еді. Яғни азаматтар мен мемлекетті зардапқа ұшыратқан алаяқ құрылысшыларды жүйелі түрде бақылауға алу болатын», – деп жазды Базарбек Facebook парақшасында.

Алайда Сенат құжатты талқылау барысында бұл норманы алып тастауды ұсынған. Сенаторлардың пікірінше, үлескерлердің ақшасын тартуға рұқсат беру тәртібі қазірдің өзінде «Үлескерлік қатысу туралы» заңмен реттелген, сондықтан қосымша тізім енгізудің қажеті жоқ.

Сонымен қатар Сенат өкілдері тізімге енгізудің негізі ретінде көрсетілген «алаяқтық ісі бойынша сот шешімі» түсініксіз екенін айтқан. Олардың пікірінше, заң жобасында қандай сот үкімі (айыптау не ақтау) негіз болатыны нақты жазылмаған, кей жағдайда құрылысшының өзі де жәбірленуші болуы мүмкін.

Бұған қоса, Сенатта тізімге енгізу туралы шешімге шағымдану тетігі қарастырылмағанын айтып, бұл норманы не толық жетілдіруді, не мүлде алып тастауды ұсынған.

Еске салайық, жаңа Құрылыс кодексі жобасы Мәжілісте қараша айында мақұлданған еді. Құжат Сенаттың түзетулерінен кейін қайта Мәжіліске қайтарылады.