Мәжіліс төрағасы Тәжікстан Парламенті жоғарғы палатасының басшысымен кездесті

27 тамыз күні Астанада ҚР Мәжілісінің төрағасы Ерлан Қошанов Тәжікстан Республикасының Маджлиси Оли Маджлиси милли төрағасы Рустами Эмомалимен кездесті. Тәжікстан Парламентінің жоғарғы палатасының басшысы Қазақстанға ресми сапармен келді.

Ерлан Қошанов әріптесін қайта сайлануымен құттықтап, Қазақстан мен Тәжікстанды ғасырлар бойы қалыптасқан бауырластық пен достық байланыстырғанын атап өтті. Оның айтуынша, Қасым-Жомарт Тоқаев пен Эмомали Рахмонның тұрақты кездесулері екіжақты ынтымақтастықты жаңа деңгейге көтеріп отыр.

Кездесуде парламентаралық байланыстарды нығайту, көпжақты алаңдардағы ықпалдастық және заң шығару тәжірибесімен алмасу мәселелері талқыланды. Сонымен қатар тараптар цифрлық инновациялар саласындағы серіктестікті дамытудың маңызын атап өтті. Мәжіліс төрағасы Қазақстанның электронды үкіметті дамыту индексінде алдыңғы қатардан көрінгенін айтып, жасанды интеллект туралы заң жобасы мен Цифрлық кодекс бойынша жұмыс жүріп жатқанын жеткізді.

Тәжікстан депутаттары Қазақстандағы әлеуметтік реформаларға қызығушылық танытты. Қошанов «Педагог мәртебесі туралы» заң мұғалімдердің жағдайын жақсартқанын және бұл бағыттағы жұмыстар жалғасып жатқанын айтты.

Өз кезегінде Рустами Эмомали Қазақстанмен ынтымақтастық Тәжікстанның сыртқы саясатындағы басымдық екенін айтып, парламентаралық байланыстың жыл сайын кеңейіп келе жатқанын ерекше атап өтті. Ол екі елдің сауда-экономикалық, инвестициялық, инновациялық, ауыл шаруашылығы және мәдени саладағы әріптестігін нығайту әлеуеті зор екенін жеткізді.

Кездесу соңында тараптар бұл сапар қос мемлекет арасындағы достық пен серіктестікті одан әрі тереңдетудің нақты қадамы болатынына сенім білдірді.