Мәжіліс төрағасы Мажарстан Мемлекеттік жиналысының төрағасымен кездесті

24 қыркүйекте Астанада Мәжіліс спикері Ерлан Қошанов Қазақстанға ресми сапармен келген Мажарстан Мемлекеттік жиналысының төрағасы Ласло Кёвермен кездесті. Тараптар екі ел парламенттері арасындағы ынтымақтастықты нығайту жайын талқылады.

Бұл – Ласло Кёвердің Қазақстанға үшінші сапары. Мәжіліс төрағасы соңғы жылдары қазақ-мажар қарым-қатынасы жаңа деңгейге көтерілгенін атап өтті. Ол 2023 жылы Мажарстан премьер-министрі Виктор Орбанның Қазақстанға жасаған сапары мен Қасым-Жомарт Тоқаевтың Будапештке барған мемлекеттік сапары нәтижелі болғанын еске салып, қол жеткізілген келісімдерді заңнамалық тұрғыда қамтамасыз ету – ортақ міндет екенін айтты.

Кездесу барысында тараптар парламентаралық байланысты дамытуда депутаттық достық топтары мен заң шығару ісінде тәжірибе алмасудың маңыздылығына тоқталды. Ерлан Қошанов Қазақстан мен Мажарстан парламентшілері арасындағы диалогтың жоғары деңгейде екенін атап өтіп, сапар екіжақты қарым-қатынасты күшейтетінін жеткізді.

Әңгіме барысында Қазақстандағы ауқымды реформалар, Президент Жолдауында айтылған бастамалар және Жасанды интеллект туралы заң жобасы да сөз болды. Қошанов Мажарстанның бұл саладағы тәжірибесімен бөлісуге дайын екенін атап өтті.

Өз кезегінде Ласло Кёвер қазақ пен мажар халықтарының тарихи және мәдени жақындығын айрықша атап өтіп, парламентаралық байланысты елдер арасындағы берік көпір деп бағалады. Ол Қазақстанда бір палаталы парламентке көшу жоспарланып жатқан жағдайда Мажарстан өз тәжірибесін бөлісуге дайын екенін айтты.

Кездесуде тараптар сауда-экономика, инвестиция, ауыл шаруашылығы, көлік-транзит, энергетика және мәдени-гуманитарлық салалардағы әріптестіктің келешегін де талқылады.

Жиын соңында Мәжіліс төрағасы Ерлан Қошанов Мемлекет басшысының атынан Ласло Кёверге Қазақстан мен Мажарстан арасындағы ынтымақтастықты нығайтуға қосқан үлесі үшін «Достық» орденін табыс етті.