Мәжіліс төрағасы Ерлан Қошанов Қатарда өткен Араб-Ислам саммитіне қатысты

Президент Қасым-Жомарт Тоқаевтың тапсырмасымен Мәжіліс төрағасы Ерлан Қошанов Қатар астанасы Дохада өткен төтенше Араб-Ислам саммитіне қатысты. Жиында ол халықаралық қақтығыстарды реттеудегі Қазақстанның ұстанымын жариялады.

Саммит барысында Ерлан Қошанов Қатар Әмірі шейх Тәмим бен Хамад Әл Тәнимен жеке кездесіп, Президент Тоқаевтың сәлемі мен ізгі тілектерін жеткізді. Қатар Әмірі Израильдің әскери әрекеттеріне қатысты Қазақстанның алғашқы болып айыптау білдіргенін ерекше атап өтіп, ризашылығын жеткізді.

"Қазақстан Президентімен біздің ерекше бауырластық әрі достық қарым-қатынасымыз бар. Саммитке қазақ делегациясының жоғары деңгейде қатысуы біз үшін маңызды", – деді Қатар Әмірі.

Өз сөзінде Мәжіліс спикері Таяу Шығыстағы геосаяси ахуалға тоқталып, Израильдің Қатар аумағындағы әскери әрекетін қатаң айыптады.

"Бұл Қатар Мемлекетінің егемендік құқығын бұзады және халықаралық құқық қағидаттарына қайшы келеді. Осындай шабуыл мемлекеттің қауіпсіздігіне ғана емес, халықаралық тәртіптің негізін басшылыққа алатын мемлекеттердің теңдігі мен егемендігіне де нұқсан келтіреді", – деді Ерлан Қошанов.

Мәжіліс спикері Қатардың өз бітімгершілік саясаты арқасында жаһандық тұрақтылық пен қауіпсіздікті қамтамасыз етуге орасан үлес қосып келетінін атап өтіп,  халықаралық қақтығыстар мен жанжалдарды реттеу мәселесі бойынша Қазақстанның ұстанымдарын ортаға салды.

"Кез-келген дағдарыс Біріккен Ұлттар Ұйымының Жарғысы мен халықаралық құқық нормалары негізінде бейбіт диалог арқылы шешілуі керек. Қазақстан Президенті қақтығыстарды шешуде осы қағидаларды толыққанды қолдануға, олардың мызғымастығын қамтамасыз етуге шақырып келеді. Әскери күш қолдану тек зорлық-зомбылықтың жаңа толқынын туғызады, бейкүнә жандардың қазасына әкеп соқтырады", – деді Ерлан Қошанов.

Сонымен қатар, ол Қазақстан Президентінің Газа секторындағы әскери қақтығысты тоқтату және бейбіт тұрғындарға гуманитарлық көмек көрсету жөніндегі тұрақты үндеуін еске салды. Қошанов Палестина халқына көмек көрсетуде Ислам азық-түлік қауіпсіздігі ұйымының әлеуетін пайдалану қажеттігін атап өтті.

Саммит аясында Мәжіліс төрағасы Қатар Премьер-министрі әрі Сыртқы істер министрі шейх Мұхаммед бен Абдулрахман Әл Тәнимен кездесіп, екіжақты ынтымақтастықты талқылады.