$ 454.98 € 509.53 ₽ 5.37

МӘЖІЛІС ТӨРАҒАСЫ ЧЕРНОГОРИЯ ПРЕЗИДЕНТІМЕН КЕЗДЕСТІ

Дулат Абдраманов
19 маусым 2026, 21:45
Мәжілісте Палата спикері Ерлан Қошановтың Қазақстанға ресми сапармен келген Черногория Президенті Яков Милатовичпен кездесуі өтті. Бұл екі ел қарым-қатынасы тарихындағы мемлекет басшысы деңгейіндегі алғашқы сапар. Тараптар парламентаралық іс-әрекеттің негізгі бағыттарын және екіжақты ынтымақтастықты кеңейту перспективаларын талқылады.
МӘЖІЛІС ТӨРАҒАСЫ ЧЕРНОГОРИЯ ПРЕЗИДЕНТІМЕН КЕЗДЕСТІ Сурет авторы: Фото Ж.Жұмабеков

Мәртебелі мейманды қарсы алған Мәжіліс төрағасы Қазақстан мен Черногория арасында өзара сенімге негізделген сындарлы саяси диалог қалыптасқанына назар аударды.

– Биыл біз дипломатиялық байланыстардың орнағанына 20 жыл толуын атап өтеміз. Осы уақыт ішінде Астана мен Подгорица арасында өзара сенімді саяси диалог қалыптасты. Оған Сіздің Қазақстан Президенті Қасым-Жомарт Тоқаевпен жеке кездесулеріңіз ықпалын тигізді. Бүгінгі бірлескен мәлімдемеде атап өтілгендей, елдеріміз осы серіктестік байланыстарды одан әрі тереңдетуге мүдделі. Парламент депутаттары ретінде, біз оған заңнамалық деңгейде барынша қолдау көрсетуге әзірміз, – деді Палата спикері.

Ерлан Қошанов Черногория Президентіне елімізде жүргізіліп жатқан саяси реформалар туралы және жалпыұлттық референдумда жаңа Конституцияның қабылдануы туралы айтып берді. Нәтижесінде биліктің барлық тармағының жұмысы түбегейлі қайта жүйеленіп, бір Палаталы Парламентке көшудің құқықтық негізі қалануда. Халық Кеңесі жаңа қоғамдық-саяси институты құрылуда. Мұның бәрі қазақстандықтар тарапынан кеңінен қолдау тапқан Президент Қасым-Жомарт Тоқаев реформаларының ауқымды бағдарының қорытындысы болды.

Парламентаралық байланысқа тоқталған Мәжіліс төрағасы Черногория Парламентінің спикерімен тұрақты байланыста екенін айтты. Ол Мәжілісте Скупщинамен депутаттық достық тобы жұмыс істейтінін айта келіп, екіжақты деңгейде де, Парламентаралық одақ, ЕҚЫҰ Парламенттік ассамблеясы, Еуропа Кеңесі Парламенттік ассамблеясы және басқа да парламентаралық алаңдардағы байланысты одан әрі нығайтуды қолдайтынын жеткізді.

Өз кезегінде Яков Милатович қонақжайлық танытқаны үшін ризашылығын білдіріп, Подгорицаның екіжақты ынтымақтастықты тереңдетуге ниетті екенін айтты. Ол Черногория Қазақстанда жүргізіліп жатқан өзгерістерді жоғары бағалайтынын, парламентаралық диалогты, сондай-ақ бірлескен экономикалық және мәдени-гуманитарлық жобаларды жан-жақты қолдауға дайын екенін атап өтті.

Сонымен қатар кездесу барысында тараптар туризм, цифрландыру, көлік, логистика, денсаулық сақтау салаларындағы бірлескен жобаларды іске асыру, сауда-инвестициялық байланыстарды дамыту мәселесін ортаға салды.

Соңғы жаңалықтар