Мәжіліс пен Сенат соңғы рет бірлескен отырыс өткізеді

26 маусымда Астанада Мәжіліс пен Сенаттың бірлескен отырысы өтеді. Тиісті өкімге Мәжіліс төрағасы Ерлан Қошанов қол қойды. Бұл қазіргі қос палаталы Парламенттің соңғы ортақ отырысы болмақ.

Құжатқа сәйкес, отырыс Конституцияның 58-бабы 4-тармағының 2) тармақшасына сай шақырылған. Жиын 26 маусым күні сағат 10:00-де басталады. Бірлескен отырыстар Парламенттің құзыретіне кіретін мәселелерді қарау үшін өткізіледі.

Биыл 15 наурызда өткен республикалық референдумда жаңа Конституция қабылданған болатын. Өтпелі ережелерге сәйкес, негізгі заң 2026 жылғы 1 шілдеден бастап күшіне енеді. Осылайша, қазіргі парламенттік модель маусым айының соңында өз жұмысын аяқтайды.

Жаңа Конституцияға сәйкес, Мәжіліс пен Сенат таратылып, олардың орнына бір палаталы Құрылтай құрылады. Оның құрамына пропорционалды жүйе бойынша партиялық тізімдер арқылы сайланатын 145 депутат енеді. Құрылтай заңдар мен конституциялық заңдарды қабылдап, республикалық бюджетті бекіту, премьер-министрді тағайындауға келісім беру және Үкіметтің есебін тыңдау сияқты өкілеттіктерді жүзеге асырады.