Мәжіліс электромобильдер туралы заң жобасын мақұлдады

Енді электромобильдерге арналған арнайы тұрақтар пайда болады, ал олардың иелері тұрақ орындары үшін төлемнен босатылады.

"Электромобильді қуаттау шығындары дәстүрлі көлікке қарағанда төрт есе төмен. Қоршаған ортаға зияны да жоқ. Халықты электр қозғалтқышы бар автокөлік сатып алуға қалай қызықтыра аламыз? Тек олар үшін инфрақұрылым құру қажет, яғни арнайы автотұрақтар, электрқуаттау стансалары, нақты жеңілдіктер. Сондықтан да электромобильдерді қолдау туралы заң жобасы қолға алынды", - деді ҚР Парламенті Мәжілісінің депутаты Олжас Құспеков.

Respublica партиясының парламенттік фракциясының мүшелері Айтуар Қошмамбетов пен Нұргүл Тау да электрмобильдер туралы заңнамаға өзгерістер енгізуді қолдады.

Заң жобасының негізгі нормалары жолдарды жобалау кезінде электрқуаттау станцияларын орналастыру үшін орындарды бөлуге, тұрғын және қоғамдық аймақтарда орналастыру үшін жерді резервтеуге, электравтомобиль иелерін автотұрақ үшін ақы төлеуден босатуға, электрқуаттау орындарында тұрақ ережелерін бұзғаны үшін әкімшілік жауапкершілікті енгізуге бағытталған.

Бұдан басқа, электрқуаттау стансаларын орналастыруға арналған жер учаскелері аукционсыз, ӘКК (СПК) арқылы берілетін болады. Бұдан бөлек, электр энергиясын қосу, пайдалану және тұтыну кезінде арнайы талаптар көзделген, сондай-ақ электр желілеріне өз бетінше қосылуға тыйым салулар енгізілді.

Заңның қабылдануы электромобильдер үшін инфрақұрылымды дамытуға, экологиялық таза көлікті пайдалануға жағдай жасауға және электрқуаттау стансаларын орнату жөніндегі қызметті реттеудің құқықтық тетіктерін жасауға мүмкіндік береді.