Мәжіліс депутаты Алакөл жағалауындағы инфрақұрылым жағдайымен танысты

19 тамыз күні Мәжіліс депутаты, «AMANAT» партиясы фракциясының мүшесі Болат Керімбек Жетісу облысына жұмыс сапары аясында Алакөл көлінің жағалауындағы демалыс орындарын аралап, инфрақұрылымның қазіргі жай-күйін көрді.

Облыс құрылғаннан бері Алакөл ауданына 4,8 млн-нан астам турист келген. Депутат коммуналдық жағажай мен бірқатар туристік нысандарды аралап, санитарлық тазалық, кәріз жүйесі, көлік қозғалысын бақылау және инженерлік инфрақұрылым мәселелерін талқылады.

«Алакөл – тек Жетісу облысының емес, бүкіл еліміздің туристік бренді. Соңғы жылдары мұнда үлкен жұмыстар атқарылды: жарық пен интернет мәселесі шешілді, кәріз жүйесі салынып жатыр. Бірақ әлі де жүйелі шешім қажет ететін түйткілдер бар. Басты мақсатымыз – табиғатты сақтай отырып, халыққа қолайлы жағдай жасау. Бұл бағытта мемлекет пен кәсіпкерлердің күш біріктіруі өте маңызды», – деді Болат Керімбек.

📌 Жағалауда соңғы жылдары атқарылған жұмыстар:

• Туристік нысандар саны 270-тен асты;

• 56,7 шақырым электр желісі мен қосалқы станса салынып, үздіксіз жарық берілуде;

• Жағалау толық интернетпен қамтылды, 16 базалық станса орнатылды;

• Ақши ауылында 69,7 шақырым кәріз желісі тартылып, тазарту құрылғысының құрылысы басталды;

• Санитарлық жағдайды жақсарту үшін 22 торап, 220 контейнер және 7 техника берілді;

• Қауіпсіздікті қамтамасыз ету үшін көлде 4 инспектор, 12 құтқарушы және 46 полиция қызметкері кезекшілік атқаруда.

Сондай-ақ, «AMANAT» партиясының 2023–2027 жылдарға арналған сайлауалды бағдарламасы аясында Алакөл, Кербұлақ, Панфилов аудандары мен Талдықорған қаласында 684,4 шақырым электр желілерін күрделі жөндеу жоспарланып отыр.