Мәжіліс депутаттары шетелдік мамандармен сайлау заңнамасын жетілдіру мәселелерін талқылады

Төменгі палатаның Заңнама және сот-құқықтық реформа комитетінің басшысы Снежанна Имашева мен депутат Магеррам Магеррамов ЕҚЫҰ Демократиялық институттар және адам құқықтары жөніндегі бюросының (ДИАҚБ) Сайлау департаменті директорының орынбасары Ульви Ахундлумен ресми кездесу өткізді.

Диалог барысында тараптар Қазақстан мен ЕҚЫҰ/ДИАҚБ арасындағы қазіргі байланыстардың жай-күйін, сайлау жүйесін заңнамалық тұрғыдан жетілдіру шараларын және алдағы уақытқа арналған бірлескен іс-қимыл жоспарларын талқылады.

Комитет төрағасы Снежанна Имашева мәртебелі мейманды қарсы ала отырып, Қазақстанның 1992 жылдан бері аталған халықаралық ұйыммен серіктестікті үзіліссіз әрі жүйелі түрде нығайтып келе жатқанына тоқталды.

«Сіздің биылғы сапарыңыз Қазақстан мен ЕҚЫҰ/ДИАҚБ арасындағы қалыптасқан белсенді әрі сындарлы өзара іс-қимылдың айқын дәлелі болып табылады», – деп атап өтті С. Имашева.

Кездесуде ұйым миссияларының елімізде өткен маңызды саяси науқандарды, атап айтқанда, Президент пен Парламент сайлауларын, сондай-ақ 2022 және 2026 жылдардағы референдумдарды бақылаудағы рөлі жоғары бағаланды. Сонымен қатар тараптар келесі мәселелерге ерекше назар аударды:

 Адам құқықтары мен заң үстемдігін қамтамасыз ету;

 Сот жүйесінің дербестігін нығайту;

 Гендерлік теңдікті ілгерілету және адам саудасына қарсы күрес.

Шетелдік делегация өкіліне биылғы наурызда өткен референдум нәтижесінде жаңартылған Конституцияның негізгі бағыттары және Ата заңды іске асыру мақсатында әзірленген заңнамалық түзетулер туралы егжей-тегжейлі ақпарат берілді.

Кездесу соңында екі тарап та сайлау процестерін дамыту бағытындағы сындарлы диалог пен әріптестікті жалғастыруға дайын екендіктерін растады.

Мәжілістің Баспасөз қызметі