Мәжіліс депутаттары ең төменгі жалақыны 85 мыңнан 110 мың теңгеге көтеруді ұсынды

Қазақстан Парламенті Мәжілісінің Әлеуметтік-мәдени даму комитеті ең төменгі жалақы мөлшерін 85 мың теңгеден 110 мың теңгеге дейін арттыруды ұсынды.

Бұл бастама Халықаралық еңбек ұйымының ұсынымдарына сүйене отырып әзірленген жаңа әдістемеге негізделген. Ұсыныс «2026–2028 жылдарға арналған республикалық бюджет туралы» заң жобасын талқылау барысында айтылды.

Маусым айында Қаржы министрі Мәди Тәкиев жаңа есептеу әдістемесіне сәйкес 2026 жылы ең төменгі жалақы 90 мың теңгеден асуы мүмкін екенін айтқан еді. 

Алайда тамыз айында вице-премьер Серік Жұманғарин бұл жоспардың кейінге шегерілгенін мәлімдеп, қазіргі экономикалық жағдайда ең төменгі жалақыны арттыру көзделмегенін айтқан.

Қаржы министрі Мәди Тәкиев те сол кезде ЕЖТ кемінде 90 мың теңге болуы тиіс, бірақ бюджеттік және инфляциялық шектеулерге байланысты оны арттыру әзірге мүмкін еместігін түсіндірген болатын.

Қазір Қазақстандағы ең төменгі жалақы мөлшері – 85 мың теңге, ал медианалық жалақы – шамамен 300 мың теңге.

Мәжіліс депутаттарының жаңа бастамасы жүзеге асса, бұл миллионнан астам жұмысшының табысына және бірқатар әлеуметтік төлем мен жәрдемақының көлеміне әсер етуі мүмкін.