Мәулен Әшімбаев жаңартылған Парламенттің спикері болу туралы сұраққа жауап берді

Сенат төрағасы Мәулен Әшімбаев журналистердің «жаңартылған Парламенттің спикері болуға ниетіңіз бар ма?» деген сұрағына жауап берді.

Әшімбаев бұл тақырыпты ерте қозғалған пікір деп атап, қазіргі басты міндет – заңнамалық жұмысты сапалы аяқтау екенін айтты.

«Қазір тек талқылау процесі жүріп жатыр. Алда 2026, 2027, 2028 жылдар бар. Сондықтан қазір бірдеңе болжайтын уақыт емес деп ойлаймын. Мен өзімнің және әріптестерімнің назарын биылғы міндеттерге аударып отырмын. Бізге осы жылы ең маңызды заңдарды қабылдау қажет. Бұл – біздің үлкен жауапкершілігіміз», – деді Сенат төрағасы.

Ол сондай-ақ кейбір әңгімелерді «спекуляция деңгейіндегі пікірлер» деп атап өтті.

«Біздің міндет – жыл соңына дейін қалған уақытта ел үшін маңызды заңдарды қабылдау. Барлық әріптесіміз осы бағытқа шоғырланып отыр. Егер жаңа ұсыныстар немесе пікірлер болса, әрине, тыңдауға дайынбыз», – деді Мәулен Әшімбаев.

Президент бұған дейін Қазақстан халқына Жолдауында бір палаталы Парламент құру бастамасын ұсынған болатын. Қазір Парламенттік реформа жөніндегі жұмыс тобы осы бастама аясында жұмыс істеп жатыр.